|
Saint O'uennais, oués quej'sommes, allonge perdre nos droits Pour l'amour de quique lâche, de la race des Corbets, Voulous perdre l'honneur, que nos puôres viers pazens Ont vaillamment gangni, en répendant lus sang. N'annin, chant fais n'annin, j'allons nos r'mâté tous Pour suivre nos couleurs, et m'algré nos jaloux Je montrezons que j'sommes, tous de vrais patriotes Et jrestézons jerriais. Oui, malgré les despotes. Je suivrons nos couleurs, les couleurs de nos pézes Qui portent en lettres d'or, une inscription si chiéze Ch'est un trésor pour nous, que jsezons bein gardé Et j'lé r'mettrons intact, à noute posterité. Et si j'amais Jerri, à besoin d'nos services Ou nos r'verrais combattre, en tête de la Milice Ou verrais l'Number One, comme autefais a la tête Et j'sezons conservé, l'honneur de nos anchêtres. Si drainnement nos j'ennes gens, se criant malmenés Ont hésité d'marchi, ch'est qui s'criaient trompés Car si n'avaient pas ouï l'Coronnel Le Cornu, Ils avaient tous l'idée q'Saint Ou était vendu. Mais quand l'brave Coronnel, lus dis q'ché n'tai pas l'cas Qui t'naient la plieche d'honneur, et qui n'la perdraient pas, Y les ranimi tous, et les mins si contents Que chtai comme un seul homme qui r'serridrent lus rangs. Ah! y n'sattendais pas, qu'and y fudrent finis Que treize braves d'entre ieux, s'nallaient être saisis, Pour être trainés dans chute maniéze de Cohue Présidée par un homme, qui fait n'ou dis d'san mue. Enfin! qu'ique jours après, n'ou présenti l'ploton Au Juge qui fit l'présent, de lus condamnation, Car avious jamais veu, des hommes si respectables Entré dans une Cohue, pour en r'sorti coupables. Enviés à la Roquette, comme de vils criminées, S'uos une accusation, qui n'pus pas ête prouvée Et sil'ont pour quique jours, perdu lus liberté, C'hetai ove la conscienche d'avai tréjous bein fait. Car y n'avais Daimmé, ni insulté personne, Ni cherchi à c'hvauchi ou êcrasé d'puôres hommes, Au contraize, lus condite dévzait servi d'leçon, A des vilains jaloux, et qui l'sont sans raison. Mais il est bétôt temp, que tout c'honnena finisse Ou bein d'vant bein longtemp chen s'ca fait d'la Milice, Car depis q'nos Etats, ont trébuqui la loi Nou est pieze que d'sesclaves chest l'Diâtre à confessé. Nos messieux d'éve savé, q'la loi q'javons angnet Est pus d'chent milles fais pièze, q'la sienne du temp passé Et en hommes raisonnables, chest à ieux d'la r'applé D'pis qui n'peuvent pas faize mus qui nos r'donne n'oute vielle loi. Qui nos donne comme autefais d'sofficiers raisonnables, Et d'Sinstructeurs Jerriais, jen avons d'bein capables Qui pu'orront traité d'shommes, comme au buoan temp passé Pas d'Soudards de Parnell, à nos cachi au fouet, Si nos membres d'Etat, ont deux onches de raisonnables Y d'éve nos accordé le p'tit que j'lus d'mandons Si chest qui nos l'accorde y verront q'les Jerriais, Sont tous d's hommes aussi bràves qui ien ai ieu jamais. Cat la Reine d'Angleterre, parmi tuôs ses sujets N'en a pas peu trouvé d'pus loyaux q'les Jerriais Qu'and à nous, à Saint Ou, quil arrive qui voudra, Je restezons fidèles... à la Reine Victoria. Et si s'rarrive jamais q'nou r'maltraite noute Milice, Jizons à noute bouanne Reine, et là jézons justice; Je sis seux que j'lezons pour l'amour de Saint Ou, Ou bein mon nom n'est pas le puôre vier D'ouard Hâcou. D'ouard Hâcou 1891 |
Viyiz étout: