Les Pages Jèrriaises

Des pièches èrcordées



I' y'a tchiques années quand j'enseignais l'Jèrriais es clâsses du sé, iun d'mes êtudiants - un bantchi angliais - mé d'mandit d'èrcorder deux'trais pièches dé poésies et d'prose en Jèrriais êcrites par dé fanmeux auteurs. Et, don eune bouonne séthée j'nos y mînmes à tigue dé corps et j'èrcordîmes onze pièches et l'rêsultat est eune cassette qui couort pour à peu près eune heuthe.

Né v'chîn eune bouonne pièche dé prose par Sidney W. Bisson M.A. Maître d'Êcole au College Victoria dans man temps, et pus tard Avocat d'la Cour Rouoyale et Greffier Judiciaire.

Les Mauves

Chutte pièche-chin fut écrite par George William dé Carteret, un St. Piérrais, né en avri, 1869 et décédé le 4 dé septembre, 1940. Le Sieur dé Carteret 'tait fèrmyi dans sa pâraisse natale et fut        Ségrétaithe de l'Union des Fèrmièrs dé l'Île pour tchiques années. Il êcrivit eune mâsse d'articl'yes et d'vèrsets, - la grand' partie souos l'nom d'plieunme du Cahouain, pour les Chroniques dé Jèrri chaque sanm'di. R'citeux et conmédien auve l'întellect d'un savant.

La Chasse à la Souothis
Eune Députâtion.

Les versets tchi sievent sont l'histouaithe d'un janne homme qui fut enrôlé dans la Milice en 1900 - eune vraie conmédie, mais jé n'savons pas lé nom d'l'auteur.

Comment Qué J'fus Enrôlé Dans La Milice

Ches vêrsets-chîn par lé fanmeux Docteu Fraînque Lé Maistre, l'auteur du Dictionnaire Jersiais-Français et des chentaines d'articl'yes et d'vèrsets en Jèrriais, nos donnent eune bouonne idée d'la variêté d'temps que j'avons ichîn en Jèrri.

Tchi Temps.

Ches deux'trais vèrsets, par Madanme Amelia Perchard - qu'a tréjous êcrit souos l'nom d'plieunme dé A.L.P. - nos montrent comment qu'la vie peut être duthe pour un êfant. Amelia, qui pale du bouôn St. Martinnais a êcrit des douzaines de bouonnes articl'yes et d'vèrsets entouor le temps, la natuthe, la campangne, l'histouaithe dé Jèrri, et cétéra, et ou contribue rédguliéthement ès Nouvelles Chroniques du Don Balleine sans pâler dé toutes ses contributions a l'Eisteddfod avaû l's années.

Tchi Vie.

Lé dgialogue tchi siet, ercite auve Mde. Adeline King, fut êcrit par lé fanmeux George Francis Lé Feuvre ou George d'La Forge, san nom d'plieunme. Ses deux livres, Jèrri Jadis et Histouaithes et Gens d'Jèrri fournissent eune mâsse d'înformâtion, entouor sa vie et s'n enraichinnement Jerriais. Il êcrivit des chentaines d'articl'yes pour la Gâzette du Sé et, auve ses deux livres, v'là tchi constitue eune production abondante dé toute la littératuthe dé Jèrri.

La Biche Est Dans Les Chours.

Chutte pièche-chîn est par Philippe Le Sueux Mouothant. Il êcrivait souos l'nom d'plieunme de Bram Bilo et 'tait p'têtre le miyeu auteur dé Jèrriais d'son temps et La Vendue ieune dé ses miyeuthes.

Lé Chent'nyi Bram à La Vendue.

Ches vèrsets sentimentals fûtent êcrits par Philippe William Luce, ne lé 17 dé dézembre, 1882, à St. Louothains et decédé lé 20 d'Juilet, 1966 au Cannada. Il êcrivait souos l'nom d'plieunme dé Philippe dé la Golarde et 'tait, comme son fréthe E.J. Luce, considéthé iun des miyeu compositeurs dé farces, p'tites conmédies amusantes et d'chansons dé son temps.

Man Grand-Péthe

Ches vèrsets, hardi amusants, fûdrent composés par Jean Picot, le péthe dé la défunte Lucille Picot, Ségrétaithe dé L'Assembliée d'Jèrriais pour bein d's années. I' fut né à St. Hélyi lé 4 dé févri, 1846, et mouothit lé 30 dé dézembre, 1922. Grâce au Bulletîn d'L'Assembliée nou connaît pus d'trais chents vèrsets par ch't auteur et chein tchi siet en sont parmi d'ses millieurs - et hardi amusants.

Not' Picnic.

Et finnalement, acouo deux'trais vèrsets par Jean Picot.

Ma Vielle Câsaque

 

Viyiz étout:

 

Les Pages Jèrriaises