Les Pages Jèrriaises

Piéche et 'R'citâtions

 

Piéche et 'R'citâtions La préface d'un livre est une chose bein importante. V'là qui dounne à un auteur la chance d'expl'yitchi la raison-d'être de san travas et de dithe coumment qu'il est v'nu à êcrithe les pages du volume, p'tit ou gros, risibl'ye ou sérieux, qu'i' présente au public.

J'n'avons pas la prétention d'app'ler chès deux-treis pages ichin un volume ou un livre. J'n'avons pas in'ntou l'intention d'nos glorifier du titre d'auteur.

Mais, avec tout ch'là, une petite préface ne f'tha pon d'ma' à persounne et autant vaut dithe pour tchi raison que chonn'chin a 'tè imprimè. - J'en profit'tons ètou pour ermércier conv'nabl'yément notr' vièr ammin, M. Jean Picot, de "Midland." Trin'tè, qu'a yeu l'obl'yigeance d'êcrithe, pour nos lecteurs, deux piéches de poësie.

Ne v'là tchic années que l'jerriais qu'menche à être ergardè de pus en pus commme tout à fait digne de prendre sa plièche sus les strades ès concerts et dans les séthèes de fêtes d'êcoles, etc.

Y'a dêjà longtemps qu'le "doyen" des raconteurs Jerriais, notr' vièr ammin, "CH'LA S'PEUT" qu'menchi à en faithe la preuve, ès dînièrs d'la Société Jerriaise, à Londres, et ailleurs. Difféthentes êcoles ont mins notr' vielle langue sus lus programmes de concerts déd'pis plusieurs années. Enfin, l'Eisteddfod de 1912 lis dounni une petite plièche, grâce à la Sociétè Jerriaise de Londres, et l'rêsultât fut que notr' vièr lingo fut appréciè coumme i' l'méthitait - pus qu'autchune autr' chose.....

Ch'est pour dounner satisfaction au d'si' dé bieaucoup d'personnes dans toutes les parties d'l'île que chès trais ou quatre piéches ichin ont 'té publièes.

Pliessent les siens qui les r'cit'tont et les siens qui l's'entendront 'r'citer comprendre que l'vièr langage de notr' pays méthite d'êtr' aimè et est digne d'être d'visè par touos les Jerriais qu'ont occuo du sang d'lus anchêtres dans les veines!

E.J. Luce
Janvi 1913

 

Viyiz étout:

 

 

Les Pages Jèrriaises