Le Ménage ès Feuvres,
St. Ouën.
Lé 8 d'octobre, 1977.
Moussieu l'Rédacteu,
J'viyais dans ieune des gâzettes publiées vèrs la fîn d'septembre qué nouos pêtcheurs sé pliaingnaient qué les pêtcheurs Français sont à êpuîser la pêque du paîsson lé tou des Mîntchiers, et tch'il' ont fait d'sorte tch'i' ait du monde à d'meuther là dans l'êté pour les empêchi (les Français) d'êprouver à les r'cliâmer à titre d'otchupâtion.
Ch'n'est rein d'nouvé. J'm'èrsouveins qué ch'tait la même turlutte en 1947. J'èrvîns d'Améthique en 1946, l'année qué j'mé r'tithis d'affaithes. Dans chu temps-là, lé Lieut'nant Gouvèrneux 'tait l'Général Messire A. E. Grasett, un charmant moussieu Cannadgien. J'avais tréjous voulu visiter Les Mîntchiers, et i' s'adonnit qué j'eus eune învitâtion dé Moussieu l'Connêtabl'ye Francis Le Boutilyi d'St. Ouën d'aller à bord du remorqueur Duc de Normandie auve eune députâtion des Etats pour eune visite officielle des îles. Ch'tait un bieau jour et la mé 'tait calme en nouos en allant, et Moussieu l'Gouvèrneux 'tait, comme d'habitude, dé bouanne heunmeu. Quand j'vînmes en veue des Mîntchiers j'nouos appèrcheunmes tch'i' y'avait eune couleu Française au haut du mât sus la Maîtr'Ile.
Nouot' Cap'taine ancrit en rade et env'yit un p'tit baté à tèrre auve l'ordre d'înviter l'îndividu Français tch'avait mîns la couleu au haut du mât à v'nîn à bord du Duc de Normandie rencontrer l'Gouvèrneux. Ch'tait un moussieu Français d'conséquenche, et i' vînt à bord sans embarras et fut présenté au Général Grasett, tchi lî d'mandit san nom et où'est tch'il avait ieu l'autorité dé mett' eune couleu Française à haut.
Je n'mé r'souveins pus d'l'identité du moussieu Français, mais l'Gouvèrneux lî dît qué Les Mîntchiers 'taient térritouaithe Britannique et qué, dans sa capacité dé r'présentant d'Sa Majesté le Rouai d'Angliétèrre, ch'tait san d'vé dé l'ordonner dé d'scendre la couleu Française înmédiatement. Lé moussieu Français fut bein poli et n'fît autcheune objection à l'ordre du Gouvèrneux et lî dît tch'i' s'en allait l'obéi du coup. I' châtchîdrent dé main là d'ssus et eûdrent eune fais à baithe à la santé du Rouai d'Angliétèrre et du Président d'La République Française.
D'èrtou sus l'île, lé moussieu d'France d'valit lé Tricolore dé san pays, et en présence du Gouvèrneux Grasett nouot' Cap'taine mînt lé Union Jack au haut du mât. Lé Gouvèrneux nouos dît tch'i' s'en allait avèrti l'gouvèrnément Angliais qué les Français 'taient à êprouver à lus êtablyi sus Les Mîntchiers, et j'mé sis d'mandé d'pis si ch't' occâsion là fut p't-êt' lé c'menchement des êvènements tchi fûdrent la cause du procès d'vant La Cour Internationale de La Hague (Hollande) tchi finnit par Les Mîntchiers êt' confirmés comme étant Britanniques.
Dans ma lettre du 24 dé septembre, j'disais tch'i' fallait féliciter l'Sieur Rubach dé Gros Nez pour aver êcrit à la gâzette au sujet d'la consèrvâtion, dans s'n êtat naturel, des Landes dé St. Ouën. L'affaithe est dév'nue séthieuse à ches drein, et i' faut féliciter l'Sieur Kenneth Vibert, dé Gros Nez étout, pour aver accepté d'êt' à la tête d'un conmité d'gens pour combattre lé dangi d'en faithe un empliaichement pour la brul'lie du foustra d'l'Île. Et i' faut féliciter Moussieu Allen Clarke, tchi d'meuthe au haut du Mont du Vallet, pour aver entréprîns la tâche d'êt' lé ségrétaithe dudit conmité, et pour san mangnifique discours dans la Salle Parouaîssiale en faveur dé la consèrvâtion des Landes.
Et l'prix d'honneu va au Sieur Harold Michel pour sa lettre au sujet dans la gâzette du 7 d'octobre. Chutte lettre nouos donne eune raide bouanne idée du saccage et du pité qué les gros camions remplyis d'foustra f'thaient dans nouos p'tites routes tchi mènent ès Landes. Nouos Mielles en sont dêjà surchèrgies, d'foustra, et l's habitants d'chu vaîthinné-là en ont jusqu'au noeu d'la gorge.
Faut-i' qu' Les Landes, aut' fais un supèrbe tapis d'bruëthe, lé seul qué j'connais dans l'Île, dêjà en dangi d'saccage à des bords par les c'mîns faits par les motos, d'veingent la maie d'foustra d'l'Île?
Landais mât' ous sus vouos pids d'driéthe, et séyiz en garde!
George d'La Forge
Viyiz étout: