Le Chef me dit l'aut'e jour, "Caouain," je crai que nos lecteurs es'saient bain contents si tu lus êcrivais un articlye lus démontrant comment qu'i' pouorraient faithe pour dévenir riches.
Je n'sais pas comment qu'i' v'nait à m'proposer ditèt, car i' d'vait bain saver que si j'en avais connu le moyen, i' y a longtemps que je s'sais dévenu millionaithe.
Je crai qu'i' voulait tout simplyement se fichi d'mé.
Enfin, je m'en vais vos donner tchiqu'unes des méthodes que j'ai éprouvé pour mé-même, mais malheutheusement sans aver atteint un grand succès.
Ous avez tous ouï pâler d'ches millionnaithes-là qui lus vantent qu'i' c'menchirent raique avec douze sous dans lus pouchette et sans ni cauches ni bottes à lus pids.
Eh bain ch'est un tas d'niollin chenna.
J'y ai êprouvé mé!
Je halli mes cauches et mes bottes et j'allais nueux-pids pour des s'maines de temps, et tout ch'que j'en eu fut que je fus obligi de dêpenser man douze sous à acater de l'onguent pour dgéthi mes r'frédeuthes.
Chu système-là ne vaut rain.
Une autre méthode qui n'est pas trop mauvaise est d'annoncer au public qu'ous avez une quantité d'shares à vendre dans une mine d'or de tchique carre dans louest d'l'Améthique.
Où les vendez chinq louis la pièche payables au comptant mais i'y a chu p'tit d'savantage ichin, qu'i' faut être prêt à r'muer d'un moment à l'autre, car dès qu'les pus tchuthieurs de vos clients ont ieu l'temps d'aller jusque là-bas, et sont r'venus sans trouver la localité, i'y a tréjous l'dangi qu'i' pouorrait y aver du combat dans votre office, et votre bisnesse pouorrait souffri en conséquence.
Un plian éttou qu'a tchiquefais réussi si bain que les siens qui l'ont êprouvé ont trouvé une bouanne job pour le Gouvernment pour djix ou tchinze années d'temps sans aver à lus otchuper comment faithe des sous, est ch'tis-chin.
Dans des séthées qui fait hardi bas ou rencontrez un homme qu'a tout-pliain d'sous sus li et ou li proposez de li vendre un pistolet qu'ou montrez avec le canon touané d'san bord, naturellement. Il est probablye qu'i' vos don'na tout ch'qu'il a sus li.
Un autre truc qu'a san bouan côté est d'imiter Jack Dempsey, Carpentier et ches autres messieux-là.
Tout ch'qu'ous avez à faithe est d'monter sus une pliateforme devant deustrais chents mille personnes, attraper quatre ou chinq talmouses, et la direction vos paie vaie chinquante ou souaixante mille louis.
Personnellement je n'ai pas êprouvé chute méthode-là, pour la simplye raison que v'là tchi f'thait trop d'pliaissi à Marie Hibou de m'vaie attraper une bouanne slindgeuse.
Si ch'est qu'nou veur des sous, ch'est d'aller ouest qu'i' y en a.
Comme par exemplye, une banque.
Je fus frappé un jour par la facilité avec tchi qu'un homme fit un mouoché d'sous.
Il entri tout bouannement dans iune de nos banques, dit "Bonjour," au "cashier," et mins sus l'conteux un p'tit morcé d'papi qu'était blu et rouoge.
En même temps i' li passi une pouque.
L'autre ergardi l'morcé d'papi, le mins dans un titheux et avec une palette se mins à emplyi la pouque avec des souverains, comme s'il avait 'té à ensatchi du guaîno. "Ah!" j'pensi, "v'chin tchiquechose qui vaut la peine de saver."
Le surlendemain en fouolliant dans l'desk au Chef je trouvi un p'tit livre qu'était pliain de p'tits papiers comme le sien que j'avais veu, j'en halli iun et opprès aver mins bas eune longue rangie d'chiffres, je signi les noms de deux d'nos Directeurs et je m'en fus à la banque, portant à ma main une pouque dans tchi que Marie Hibou garde sa couôtuthe.
Quand j'mins ma pouque sus l'conteux et que j'passi man p'tit papi au "cashier," i' l'exzamini bain minutieusement et pis me r'gardi d'une drôle de manièthe.
A la pliaiche de ramasser sa palette comme je m'attendais, i' s'touani d'bord et se l'vant sus l'but d'ses ortès il allouogni l'co par en d'sus d'un espèce de châchais et s'mins à pâler à tchiqu'uns là driéthe.
J'attrapi justement les mots, "Manager," "téléphone," et "Police Station," et je m'imagini qu'i' d'vait y aver tchique chose alentou d'man papi qui n'tait pas trop en règlye, ch'est pourtchi pour êviter toute confusion, je scodi hors de la banque et couothant avau la cauchie, j'eus justement l'temps de sauter à bard du baté qui s'en allait à St.-Malo.
Evidemment chu système-là ne peut pas être erquémandé.
Enfin, ou pouvez atchumuler des richesses par les moyens qui vos semblyent les miyeurs, mais permettez-mé de vos mettre sus vos gardes.
Nou m'dit que la pus grande partie des gens riches sont minséthablyes.
I'n'savent pas tchi faithe de lus sous. I' n'veulent pas en dêpenser, ils ont peux d'en perdre, ont tréjous l'idée que nou cherche à les voler, et finalement la gêne d'esprit les fait tchaie dans la malsanté.
Ah ça! mes chiers lecteurs, à m'suthe qu'ou d'veindrez riches, pus acco que d'laissi vos sous vos causer touos ches inconvénients-là, i' vaudra bain mus vos en dêfaithe.
"Baîlliz m'les, à mé!"
Caouain
31/1/1925
Viyiz étout: