Ou vos r'souvenèz bein qui y-a tchique temps j'vos dis qu'ils avaient pliantai des "Lime Trees" dans l'chimetiathe du bouan berger, eh bein ! si chés bouais-là ne lus dêpèchent pas bein vite à produithe du "Lime Juice" pour calmer l'sang des bouannes gens d'la pâraisse, j'ai grand peux qui s'arrivetha des duels toute les fais yétha un assembliaie.

Je me sis aperchu que le bouan berger a bein d'la peine à manier ses brébis malgré qu'san troupeau n'est pas bein nombreux. Quand i' veur les faithe passer par unne braique, i' disent tréjous "Nennin," et qui s'y prenne coumme i' voudra, i' l'î pâssent entre les gambes et fichent lus quamp dans les pâtuthes ès vaisins. Je sis seux qui si Francis y viyait san qu'min clié, il en vendrait tchiqu'unnes des pièthes au bouochi.

La pâraisse avait chouaithi deux "Shepherd-boys" pour l'î bâyi un coup-de-main à souogni san troupeau, mais i' n'peut pas s'grais d'ieux du tout. I' pathaît que "Sam", le pus vi des deux, est en fichu têtouogne, et qui fait tréjous coumme bon l'î semblle et qui n'obéis pas san maître du tout.

Quand l'idèe l'î monte dans la tête, i' s'mettra à tondre unne brebis sans la permission du bouan berger, quand maîme que che s'rai hors saison, et si la brebis veint à en mouothi, i' prend sus li de l'enterrer dans un coin du gardin quand san maître y-a dit qu'i' fallait la mettre dans l'aute quarre.

Chein qui y-a de pus drôle, ch'est que toutes les brebis aiment bein chu garçon là, et l'autre jour quand l'bouan berger èsprouvi à l'î dounner san "walking-ticket", toutes les brebis suivirent Sam hors de dans l'clios, et l'pouor' berger s'en allait les perde toute si n's'était pas décidé de rengagi Sam pour oquo un an.

L'autre jour, à l'assembliaie, j'étais jutchi sus l'haut du safe ouais qu'Fraînque garde les livres de la pâraisse. Personne ne savait que le Caouan était là, car j'étais muchi drièthe la p'tite armouaithe dans tchi que "Pouoretai" serre les boutelles de "Ginger Beer" et les tumbleurs.

Eh bein ! je vos asseuthe que j'en ouï de pus d'unne sorte.

Chein qui m'êtonni hardi ch'tait de vais George – li qui n'va jamais à prêche ni à messe – se l'ver et proposer des r'merciements à Sam et à Aide-li pour la manièthe qu'ils avaient fait lus travas. Le bouan berger fut bein étonnai èttou et i' d'mandi à George si savait ch'est qui disait, et il acchûsi Sam de n'avé pas fait san d'vé, et qu'au Dimanche qui restait à haller des mergots de s'sus san "lawn" à la pliaiche de souogni de mettre les brebis dans lus stalles, et qui v'nait un tas de brebis êtrangièthes qui n'savaient pas y'ou lus rangi et qui lus trouvaient toutes mêli-mêlo parmi les siennes, et que v'là qui faisait d'la confusion.

Sam l'î raiponni qui n'y-avait jamais veu pus de sept ou huit brebis lus présenter au Dimanche et qui y-avait à chu compte-là chent stalles de disponibles pour chaque brebis et qui n'avaient que l'embarras du chouaix.

Le bouan berger dit que ch'là n'tait pas vrai, car i' viyait tréjous tout plein d'brebis.

Alors mé, Caouan, je m'décidi de dèscouvrir le tchai des deux qu'avait raison et depis chonna j'ai tait deus-trais fais me muchi dans l'cliochi le Dimanche, et par chein qu'j'ai veu, je dêcliathe à mes lecteurs que ch'est Sam qu'est dans l'drouait, et j'ai grand peux que le bouan berger tait coumme les gens du village dans "Les Cloches de Corneville", ch'est-à-dithe que, i' viyait des "fantômes".

A bétôt, garçons, n'en vchin assez pour chutte fais.