Lé 29 dé mai, 1660, lé jour dé la Restaurâtion (l'Angliétèrre avait 'té onze ans sans rouai), en fut iun d'grand' rêjouissance partout l'Rouoyaume. Et châque année auprès ch'la y'avait des célébrâtions d'un but à l'autre du pays. En Jèrri eune Grand' R'veue d'la Milice avait lieu. Des priéthes spéciales d'èrmèrcîment étaient dites dans toutes les églyises chu jour-là et nou portait eune pétite branque dé fielles dé tchêne en mémouaithe du grand' tchêne à Boscobel (à Donnington dans l'Shropshire) dans tchi qu'Charles II s'muchit et sauvit sa vie quand ses ennemîns l'poursuivaient auprès la batâle dé Worcester lé 3 d'septembre, 1651.
La célébràtion officielle en Jèrri eut lieu pouor la dreine fais en 1807 (dans l'temps des dgèrres dé Napoléon) dans la présence du Général Don. Mais les priéthes continnuîtent à êt' faites sèrvi jusqu'en 1849. Et jusqu'à la Dgèrre dé 1914 la grand' partie des Jèrriais portaient deux'trais fielles dé tchêne lé 29 dé mai. Mais lé Rédacteu peut li-méme dithe tch'i' s'rappelle qué quand il 'tait à l'êcole y'a eune trentaine d'années l's avièrs gardaient acouo la couôteunme.
Et pis étout, associée auve chu jour-là était eune aut' tchuthieuse couôteunme d'êcolièrs tchi s'app'lait - Pinch ou Punch. Quand un mousse, tch'avait eune fielle dé tchêne à sa boutonniéthe ou dans sa main, en rencontrait un autre tch'était sans, i' lî d'mandait en forme d'tchestchion - “Pinch ou punch?” (Pînche ou tape?) et l'autre avait à chouaîsi la tchelle des deux "peunitions” tch'i' prendrait. Nou n'connait pon d'explyicâtion pouor chutte tchuthieuse couôteumne qué l's Angliais n'pathaissent pon aver (du mains, dé nouos jours). Et pouortant, la formule était d'originne Angliaîche. Mais nou disait, “Pinch ou punch?” et pas “Pinch or punch?”.
Il est probabl'ye, qué l's avièrs d'êcôlè d'à 'ch't heu n'ont pus d'idée d'chenna, dépis tchiques années; mais quand à la couôteunme dé porter eune fielle dé tchêne, nou vait acouo tchiques gens (patriotiques?) châque 29 dé mai tchi s'en r'souveinnent.
FLM
1956
Viyiz étout: