Lundi le 27 Févri 1933.
Dépis que j'avais ieu une mauvaise attaque du “Flu” i' y a deustrais s'maines ma santé a laissi hardi à d'sither et man docteu m'a dit qu'i faut que j'prenne de grandes précautions et de n'pas m'avantagi à sorti trop, sustout avec le mauvais temps que j'avons ieu à chu dernyi.
Ch'est là la raison qu'ou n'm'avez pas veu au bureau des Chroniques dépis la dernié feis que j'fu en ville.
Ch'tait la s'maine de Noué et i' m'semblye qu'i' y a une êternité. Si tu savais comment qu'i' m'ennyie et comme je trouve le temps long. Pas iun d'vous n'a seulement ieu la bonté de v'nin m'vaie! J'aithais creu que l'Chef aithait peu êpaigni un d'mié jour pour me payi une visite.
Mais il est d'même, li. Ch'est raique quand les gens sont morts qu'i' s'en otchupe et je crains hardi que les sentiments qu'il exprime dans sa gâzette ne sont pas tréjous aussi sincèthes comme nou craithait bain.
Si ch'est qu'un cîtoyen aussi notablye comme je pouorrais être, vaint à s'en aller, tan Chef apprécie tout simplyement l'êvénement comme étant bain aceptablye pour li fourni d'la copie pour remplyi ses colonnes.
Il est vrai que si j'étais v'nu à trépasser, et je t'asseuthe qu'i' n's'en est pas fallu fort, i' aithait probablyement consacré un quart de colonne souos l'titre de “Nécrologie.”
“Nous regrettons d'avoir la triste tâche d'annoncer à nos lecteurs que notre vieil ami, Mons. Clément de Caen n'est plus parmi nous.” Et pis i' s'en suivethait une liste pus ou mains fliatteuse de toutes mes qualités et un catalogue de mes longs services dans la municipalité de ma pâraisse.
Tout chenna est bain bon, mais je sis d'opinion mé, que ch'n'est pas quand les gens sont morts qu'il est temps d'lus faithe des biaux-biaux.
Nous dait aller les vaie quand i' sont malades et les rêjoui un mio dans lus affliction.
Mais laissons chenna d'côté.
Tch'est qu'en est avec té Caouain?
As-tu té malade ettou, té?
V'là passant deux mais qu'tu n'as pas êcrit dans la gâzette! Tch'est qu'chenna veurt dithe?
De Samedi en Samedi j'espethais tréjous oui ma nièche me liéthe iun de tes articlyes, mais ch'tait tréjous la même histouaithe, "I' n'y a pas d'Caouain!" ou m'disait.
Et oulle 'tait aussi d'sappointée comme mé.
Je m'attends bain que ch'tait “faute de place,” car véthitablyement les nouvelles n'ont pas mantchi!
Tch'est tout chu train-là alentou des détritus, les immondices et les vieillâquethies des difféthentes parraisses?
Acheteu qu'la ville n'en veurt pus tch'est qu'nou s'en va en faithe?
Que d'opinions au sujet, man pouore Caouain!
De chein que j'peux en vaie un châtchun dit “Brûlez-les dans un incinérateur ou mettez-les de tchique carre en un lopin, mais sus toutes choses ne les apportez pas par siez-nous.”
Et je sis de ch'tte opinion-là ettou, mé!
J'ai oui des rumeurs que Laiesse Ernon a offert sa carrièthe à la pârraisse à douze louis par an pour en faithe un dépôt, mais je m'en vais m'y opposer, sapresti!
Oulle est située au bas d'man pré et pour y aller i' faudrait que toute chute salopethie pas'sait en d'vant d'siez-nous!
J'îthai protester devant l'assembliée quand j'dévethais y être boulé dans une chiviéthe.
Je n'ai pas idée de vaie ma propriêté envahie par des rats ni les membres d'ma famille emportés par la fièvre typhoide.
En pâlant d'chenna, est-che que ch'est vrai chein que ma niéche me disait, qu'un certain Connaîtablye avait mins sus la gâzette qu'un certain Recteur était un... enfin, qu'i' s'était êcarté d'la véthité?
Et nos fermiers? Tch'est qu'i' s'en vont dévenin?
Iun d'mes vaisins m'disait qu'à l'avenin, un malheutheux fermi qui cherchethait à empêchi un Inspecteur ou autchun autre tout-s'mêle d'aller pilvâtchi dans ses patates, es'sa mins à l'amende de chinquante louis ou es'sa condamné à siex mais d'prison!
Tout d'même, j'ai d'la peine à craithe chenna.
Si ch'est vrai il est d'mêtchi de s'mettre à bâti des prîsons. Jamais Gloucester Street ne pouorra nos acc'moder tous.
Eh bain, en v'là assez pour chute feis.
Tâches don de gâgni jusqu'ichin à m'vaie.
I'y a oquo du bouan cidre dans l'prinseu.
Et acheteu qu' j'y pense, amène la “pram” à Marie Hibou, je te don'nai une satchie de Kerr's Pink à remporter.
Ma nièche te fait bain ses complîments.
A iun d'ches jours.
Tan vier amin.
Cliement d'Caen.
1933
Viyiz étout:
