Mes lecteurs ergret-tont d'appendre que Maît'e Cliément d'Caen est malade au lièt.
I' y a de vier tchinze jours qu'i' c'menchi à faithe la plaîgnole.
V'là tchi c'menchi par une suée d'fraid, et pis i' fut prins de ma dans l'dos et des maux d'tête et ses amins s'aperchurent bain que le bouonhomme avait une mauvaise attaque du “Flu.”
Et comme i' s'arrive tréjous dans des cas patheils, un châtchun li offri des conseils et des r'mièdes pour sa dgéthîson.
Maît'e Cliem, qu'est iun de ches têtouagnes-là qui n'veulent jamais oui pâler de faithe venin l'docteu, se mins à êprouver ches r'miedes-là iun opprès l'autre, avec le rêsultat, qu'entre tous ils ont presque r'pathé d'ac'ver l'bouonhomme tout-à-fait.
Le prumi li dit que la miyeu chose à faithe était de prendre un bain à l'ieau fraide touos les matins et d'aver tchiqu'un à l'frotter par tout l'corps avec une bouanne forte serviette pour ramener la cirtchulation.
Maît'e Cliém mins sans véto sus chu système-là du prumié coup, et pour deux raisons.
D'abord, avec la fraid qu'il a fait à ches dernyi, l'idée d'aver à cratchi la gliace pour sauter dans un bain d'ieau fraide la prumié chose au matin n'avait rain d'attrayant et pis quand-même i' n'y avait personne siez-li pour le frotter.
Ch'tait tout-à-fait hors de la tchestion de d'mander patheille chose à sa nièche, et quant au domestique, le bouonhomme l'avait embauchi pour traithe les vaques et travaillyi sus la ferme, mais pas pour en faithe en masseur!
Iun d'ses amins li dit qu'i' s'était dgéthi, li, par mettre un empliâtre d'moutarde sus s'n estoma, et Maît'e Cliem en fit l'êpreuve, mais i' n'pu pas enduther les tortuthes que v'là tchi li causi La chai' li brûlait comme du feu et l'estoma vint à peler, si bain qu'i' n'pouvait pas enduther l'paids d'san corset.
Le pouore vi ne cessi pas d'maudithe le peûle qui li avait erquémandé un pathiel supplice.
Un autre li dit qu'un bouan r'miède était de mettre ses pids dans d'l'ieau caude devant s'couochi et une feis au lièt de s'enfliuber la tête dans un cotillon d'rouoge fliannèt.
“Et you que je m'en vais pêtchi un cotillon de rouoge fliannèt? Je n'porte pas ditêt, mé!” se fit Maît'e Cliém.
Mais vot'e nièche dait en aver iun, lyi,” l'autre li raiponni.
“Ma nièche?” Je peux mettre tout ch'qu'oulle a d'habits dans ma pouchette de veste!”
“Eh bain,” l'autre li dit, “je crai qu'ma bouonnefemme en a iun qu'ou n'fait pas servi, je m'en vais li dithe de vos l'envier.”
Et la même séthée Maît'e Cliém s'enveloppi la tête dans un rouoge cotillon d'fliannet et ch'tait d'même que je l'trouvi quand je fus vaie comment qu'il 'tait.
Je vos asseuthe que l'bouonhomme pathaîssait comique et je n'pus pas m'empêchi d'rithe.
V'là tchi l'fit mârri et i'm'dit comme chenna. “J'pense bain qu'tu connais un r'miède ettou té, Caouain! Touos les siens qui sont v'nus m'vaie m'ont r'quémandé un difféthent traitement en entre touos ieux ils ont mantchi de m'fini tout-à-fait. Ma nièche, pas pus tard qu'à matin, m'a fait avaler une demié-douzaine de pilules qu'ou prétend avé êprouvé lyi-même et qui selon lyi sont immanquablyes, mais à jugi par les lances qui m'passent à travers du corps je crai qu'la garce m'a empouaîsonné afin d'héthiter d'man bain oquo pus vite.”
“Oh! Maît'e Cliém,” je li dis, “i' n'faut pas vos imaginer ditèt, la pouore fille n'a jamais ieu de patheilles intentions à votre égard; au contraithe, ou m'pathaît tout-à-fait affligie de vos vaie aussi malade et n'aspithe que l'moment de vos r'vaie sus pid.”
“Enfin, tréjous,” se fit l'pouore vyi, “arrive tchi pliante, j'en sis fini avec les r'mièdes, si je sis pour m'en aller, tant piéthe, mais je n'm'en vais pas être mins sus un difféthent régime touos les jours pour pliaithe à touos les charlatans qui vainnent me visiter!”
“Ch'est damage, Maît'e Cliém, car je m'en allais vos suggéther tchiquechose qui vos aithait dgéthi dans treis ou quatre jours.”
“Ch'est inutile!” i's'êcriyi, “je n'veurs pas seulement en oui pâler!”
“Pourtant, ch'est un r'miède qui s'sait absolûment à vot'e goût, et ch'est la seule chose qu'a r'mins l'Chef sus ses pids. Si ch'est qu'i' n'l'avait pas adopté, che s'sait l'Caouain qui s'sait l'Rédacteur des Chroniques au jour d'annièt.”
“Oh bon? Et comment qu'i' s'est r'dgethi, li?”
“Eh bain touos les siers je l'avons fait avaler deux tumbleurées d'romme avec de l'ieau caude et du chucre.”
Quand i' oui ch'la le vier Cliément bondi dans san lièt.
“Erdis-mé chenna oquo une feis!”
Je li répêti l'traitement.
“Comment! Et l'aut'e jour i'vint un imbécile me dithe qu'i' n'fallait pas sus autchun compte touchi à d'la litcheu d'autchune espèce!”
I's'assiévi dans san lièt et m'dit, “Caouain, té pliaît-i' haller sus chu cordon-là?”
J'en fis autant et je oui une clioche sonner de tchiquebord en bas, et dans deustrais s'condes sa nièche couothi amont les d'grés et entri dans la chambre.
“Muriel,” se fit Maît'e Cliément “prend des sous dans l'titheux et va tout-d'-suite à la boutique lus dithe qu'i' m'envient siex boutelles de romme, du tout miyeu.
Dans deustrais jours ous allez r'vaie Maît'e Cliément d'Caen plianter ses patates.
Caouain
1929
Viyiz étout: