L'autre Dimanche, il y r'eut oquo un rassembliément de ches machines-là que nou peut classifier comme "niaisances publiques," les maudites motor-bikes.
Les siens qui les montaient v'naient de d'dans les pârraisses de l'Ouest.
I' y-en avait un crew de la pârraisse au bouan berger et iun ou deux de la pârraisse de la Rose et l'Louothi.
Et pis ch'est que nou n'pouorrait pas justement dithe que ch'tait d'la râcâlle, car le parti 'tait composé d'un Chentnyi, un ex-Député, un Enregistreux, des fils d'Connaîtablye, un Surveillant, un sécrétaithe d'agricultuthe et un membre du Comité des Qu'mins.
Tout allit bein pour un temps, le seul ma qu'i faisaient était d'aveuglyi les piêtons avec du ponsi et les êtouffer avec lus fichue pétrole.
Mais quand ils arrivithent de tchique quarre opprès d'la Maîtréthie les v'là qu'i rencontrent une dame qu'était à s'promener avec san tchan. Ch'tait la femme d'un offici du Connaîtablye.
De tchique maniéthe, que ch'fusse par le tchan ou que ch'fusse par les touristes, i' y-eu une mauvaise interprétation de la louai sus les qu'mins, et le rêsultat en fut une fausse manoeuvre de la part des uns ou d's autres, et crac! v'là la machine qui passe en d'sus du malheutheux tchan et v'là un chentnyi et un ex-Député les fours en haut dans la route. Nou m'a dit que l'ex-Député s'oubliyit à un tel point, qu'i pâlit bein mal poliment à la pouore dame, qu'avait ieu les sens touannés de vaie san ton-ton êcrasé comme chenna. Là-d'sus, Fraînque, li, qu'est Membre du Comité des Qu'mins, s'appréchit, et avec l'air philosophique que nou lis connaît, démandit à la dame si ch'est qu'ou connaissait la Louai sus les Tchans, sustout ch't articlye-là qui mentionne qu'i faut que tout tchan ait un collyi, avec le nom du propriétaithe inscrit d'sus. La pouore fenne était toute ênervée de s'trouver en présence d'un légiste de chu calbre-là, mais ou fut maline assez de ne r'cliâmer pas le malheutheux tchan et même j'ai ouï qu'ou fit la mîne de ne e r'connaître seulement pas.
Nos promeneurs continuirent lus qu'min.
Tchiques minutes opprès, la dame fut rattrappée sus la route par sa belle-soeu qu'était sus sa bike et qui lis dit qu'ou v'nait justement d'vaie des motoristes qui juthaient comme des perdus entouor un tchan qui l's avait trébutchis. Ou lis dit qu'oulle les avait ouïs s'lamenter que tout chenna les avait empêchis d'aller à Gouôret comme ils en avaient ieu l'intention.
La dame lis raconti chein qui v'nait de s'passer.
L'offici d'police en a pâslé à ses collègues et l'affaithe est considéthée un mio sérieuse. I' y-a ieu des pourparlers entre la police de St. Tarmin et la sienne de la pârraisse au bouan berger, et pour achteu ch'est justement comme entre le Mexique et les Etats-Unis, les relations sont un mio strainées.
Pîter Pain et sa Laïzé sont des gens tchi n'savent pas vivre!
Aussi bein l'dithe comme de l'pensé et si Pîteur compte que v'là tchi constitue un libêle, eh bein, qu'i' m'actionne dévant la grand' Cour, et pis nou verra tch'est qu'en s'sa.
Je m'en rapporte à vous, mes chiers lecteurs, pour me dithe si j'ai raison de pâler d'même. Ou savez bein que Samedi passé je vos annonci que nou z-avait besoin de jeunes hardelles au Show à
Sprinfield, pour faithe le beurre, etc.
Eh bein, v'là des gens qui n'hésitirent pas un moment, mais qui s'en furent tout drèt à Faldou interviewé le moussieu qu'avait soin d'chenna et lis présenter lus grand' baliverne de Lonore pour en faithe une
dairy-maid.
I' pathaît qu'il en fut tout-à-fait enchanté, li, et sa femme n'étant pas à la maison pour le moment, il en profiti pour embraichi "à plusieurs reprises," comme i' disent à la p'tite Cour, chute monstruosité de tchi qu'san pèthe fait un tè cas.
I' n'faut pas qu'i sait bein hênitcheux ma fé!
L'av'ous tchiquefeis veue?
Enfin, le rêsultat de tout chenna fut qu'ou fut engagie pour la grande occasion, et dès que l'brit s'en rêpandit, v'là tchi causit pus d'excitation parmi l'public que si la vieille Pankhurst lyi-même avait tai attendue pour vénin aidgi à péser l'beurre.
Le matin du Show, le gardien du Pavillon fut rêvillyi par une capuchechie ès grand' portes, et quand i' fut vaie de tch'est qu'i s'agissait, i' trouvit que ch'tait l'bouonhomme Pîteur et sa fille qu'étaient dêjà là à tintamarrer pour entrer.
I' lus ouvrit les héches et Pîteur voulit li introduithe chu phénomène, mais le gardien, qui l'avait dêjà contempliée par le creux d'la clié, en avait veu assez, et i' lis touânnit l'dos et s'en fut dêjeuner.
Les v'lo entrés dans l'bâtisse, et je vos asseuthe qu'une patheille appathition à ches heuthes-là, causit une certaine sensation parmi les domestiques qu'étaient à soigni lus vaques.
Je pouorrais vos en êcrithe des pages sus les êvenements du jour, mais je m'attends bein que Pîteur a l'intention de raconter les expériences de sa fille dans les colonnes du
Morning News et chein que j'appelons le "professional etiquette" me défend de pataugi sus l'terrain d'un collégue.
Et pis d'ailleurs, che n'tait pas là man intention du tout en abordant l'sujet. Chein de tchi que je m'pliains ch'est qu'opprès avait donné gratuitement l'information à ches gens-là, qui les a mins à même de l'occasion d'amener lus fille dévant l'public comme jamais n'avaient peu faithe dévant, i' n'm'en ont pas seu le moindre gré, au moment actuel je n'ai r'chu auchun ermerciements, et je vos assaeuthe que j'en sis bein contrarié. Je m'attendais au meins qu'i m'aithaient d'mandé d'aller siez ieux tchique Dimanche, mais zut! et v'là pourtchi que j'ai dit et que je répète oquo une feis, Pîteur Pain et sa femme ne savent pas vivre.
Caouain
La Chronique de Jersey 20/5/1914
Viyiz étout:
