J'sis un Villais, né et êl'vé coumme nou dit, et i' n'y'a pèrsonne dans ma fanmil'ye tchi pâlait l'Jèrriais. Mais quand j'tais mousse, j'aimais vaie l's articl'yes dans la gâzette du sé - Les Lettres du Bouanhomme George par George d'la Forge.
J'aimais vaie les mots coumme "pouortchi" et "couôteunmes", et ouaithe qué j'n'ouîsse qué bein rarement pâler l'Jèrriais, et qu'i' m'fûsse împôssibl'ye d'liéthe l's articl'yes, ch'na m'întéthêssit.
Ch'tait l'Jèrriais êcrit tchi attithit m'n întéthêt quand j'tais mousse, et j'dais dithe qué ch'est la littéthatuthe Jèrriaise tch'est acouo man pus grand întéthêt ach'teu. Ch'est încriyabl'ye quand j'ouais des gens tchi disent qué l'Jèrriais n'a janmais 'té êcrit. Nou dév'thait êt' fyi qué ch'tait l's auteurs des Îles d'la Manche tchi înspithaient la r'naissance littéthaithe en Nouormandie au dgiêx-neuvième siècl'ye, et qu'j'avons eune tradition d'littéthatuthe tchi date, au mains, dé 1795.
En liêsant la vielle littéthatuthe, ch'tait Elie (E.J. Luce) tchi d'vînt m'n auteur préféthé, et j'dêcidis qué ch'tait un grand pitchi qué ch'tait si difficile dé trouver des pièches en Jèrriais.
Êtant brantchi sus l'Ithangnie, i' m'sembliait eune bouonne idée d'chârer des pièches auve d'aut's gens tchi voudraient les liéthe par mouoyen du compiuteu. Jé c'menchis les Pages Jèrriaises sus ma page d'siez-mé auve tchiques poèmes. En 1998, auve tchiques chentaines dé pages, les Pages Jèrriaises fûtent èrmuées au site d'Ithangnie d'la Sociêté Jèrriaise et il' ont continnué à craître jusqu'au jour d'aniet quand j'avons pus d'mille chîn chents pages.
Et y'a acouo des gens tchi disent qu'lé Jèrriais n'a janmais 'té eune langue êcrite!
J'crai qu'lé Jèrriais est vraînment la langue d'Jèrri. La langue et la littéthatuthe Jèrriaise appartcheinnent à touos les citouoyens d'Jèrri: les Villais, les St-Ouennais, les St-Martinnais, l's Angliais, l's Êcossais, les Portûndgais... Ch'est not' langue et not' héthitage - et auve les clâsses dans l's êcoles, il appartcheindra à nos mousses étout.
Viyiz étout: