Les Pages Jèrriaises

Jèrriais, ma langue

 

Quand j'tais p'tchiot, jé n'pensais pon tch'i'y avait d'autres langues qu' l'Jèrriais, pa'ce qu' ch'tait la seule manniéthe qué nou pouvait s'esprînmer quand nou rencontrait ses anmîns ou ses vaisîns. J'tais un p'tit mio boulversé quand j'ouîyais qué ché s'sait dé l'Angliais ou dé l' Allemand, car jé n'savais pon tchi sorte d'bargouéchîn tch'i' pâlaient, ches gens!

J'fus chanceux qué j'apprins ma langue matèrnelle duthant la Dgèrre quand tout l'monde à la campangne pâlaient l'Jèrriais, et v'la tchi m'donnit un avantage quand j'fus à l'ècole, pa'ce qué j'fus oblyigi d'apprendre l' Angliais comme eune deuxième langue pour pouver faithe mes léçons et à l'âge dé huit ans, j'pouvais pâler deux langues, tchi fut un grand avantage quand j'vîns à apprendre lé Français. Mais chein tchi m'a donné un grand pliaisi avau l's années, ch'est dé pouver faithe sèrvi tant d'mots tch'ont tant d'expression auve eune langue tch'est si riche en vocabulaithe, Et pis, étout, jé n'connais qué les sèrcl'yes et bein des noms d'ouaîsieaux en Jèrriais, mais pas tréjous lus noms en Angliais!

Où'est qu'nou peut aver des mots comme lé 'tchitte-tes-clios', le p'tit ouaisé tchi veint dans mes peupliers à la maison, ou un 'achocre', un mot tchi dêcrit chutte sorte d'personne supèrbément? Y'a étout des mots comme 'bourdelot', eune pomme env'loppée dé pâte et tchuite au fou, et 'cratchillon', chutte pliante sauvage tchi pousse dans les muthâles, et qué j'avions tant d'fanne avec lé temps passé quand j'tais p'tchiot.

Ieune des choses tchi m'a fait rithe quand j'tais à Londres auve d'autres Jèrriais ou man fréthe 'Douard avau l's années, ch'est d'pouver pâler en Jèrriais et vaie les expressions d's an- gliais a èprouver à découvri tchi dgîa, tre que j'étions à dithe.

Enfin, les quatre lingnes en d'ssous, êcrites par man p'pée, explyiquent mes sentiments dé nouotre vieil'ye langue.

Mots et ditons dé nouos vielles gens
Et en mémouaithe du bouôn viêr temps.
Pense-s-y tchiquefais, car ch'est d'tchi vyi -
Bredelles et mios d'nouot' chiêr Jêrri!

 

François Le Maistre

 

 

Viyiz étout:

 

Les Pages Jèrriaises