Le Ménage ès Feuvres,
St. Ouën.
Lé 12 dé juin, 1971.
Moussieu l'Rédacteu,
J'veins d'm'abûser à liéthe eune atchumulâtion d' “Evening Posts” du mais d'mai passé et minsent dé côté pour mén arrivée en Jèrri, et i' faut qué j'félicite Jeanne Milne pour ses fanmeuses articl'yes au sujet des monuments d'Jèrri.
J'tais prîncipalement întérêssi dans la cheinne entouôrre lé charmant Robert Wace, célèbre poete du Mouoyen Âge. J'vai qu'ou donne l'année d'sa naissance comme étant 1135. Ch'est assez drôle qué les “Tableaux Historiques” par John Patriarche Ahier la donne (à la page 144) comme étant 1151. Par tchuthiôsité, j'ai r'gardé dans “La Chronologie” dé Ralph Mollet pour vaie s'il avait r'cordée dans “La Chronologie” mais ou nouos dit tch'i' publiyit san preunmié grand poème, “Le Roman de Brut”, en 1155, ch'est en tchi i' faut penser, auve raison, qu' Madanme Milne est pus correcte qué John Patriarche Ahier. S'il avait 'té en 1151 i' n'éthait ieu qu' quatre ans quand san preunmié poëme fut publié!
Lé “Encyclopaedia Britannica” donne sa naîssance (auve un point d'întérrogâtion) comme 1100, et sa mort comme 1175, et nous dit qué l'Roman dé Brut est supposé aver ''té dédié à Eléanor d'Aquitaine.' Dans san “Biographical Dictionary of Jersey” lé Révérend G. R. Balleine nouos dit qué Wace 'tait vivant et dêjà “Clerc lisant” en 1135, mais qué la date dé sa naîssance n'est pon vraiement connue. Dans san “Roman de Rou” Wace nouos dit tch'il avait connu les trais rouais du nom d' Henri, et Henri l'Preunmyi ayant passé l'pas en 1135, ch'est bein seux tch'il 'tait bein “florissant” dans chu temps-là.
Eune chose întérêssante est qué M. de la Croix, dans “Jersey, ses Antiquités, etc.”, en donnant les noms des prîncipaux Nouormands à la contchête dé l'Angliétèrre en 1066, mentionne (à la page 44 du deuxième voleunme) lé nom dé “Vace ou Wace, père du poète”. Ch'tî-là fut-i' né en Jèrri étout? M. de la Croix né nouos dit pon s'il 'tait Chevalier, Comte ou Baron, mais i' d'vait êt' un homme d'împortance pour êt' mentionné parmi touos les prîncipaux Nouormands tch'étaient à s'battre auve lé Contchérant. Ch'est don bein seux qué l'poète 'tait d'bouanne fanmile si pas d'la noblièche dé san temps.
Ch'n'est pon ravissant qué la date exacte dé sa naîssance n'est pon connue, car i' n'y avait ni R'gistres Publics, ni rein tchi r'cordait la naîssance, lé mathiage, lé décès ou les contrats d'eun îndividu à ch't êpoque-là. Tout 'tait confié à la mémouaithe ou á tchiquechose près. Pèrsonne né savait êcrithe sénon tchiques prêtres, et acouo touos les prêtres, pathaît-i', n'avaient mème pon grand' sorte d'êducâtion.
Les prêtres, moines et les réligieuses pâlaient l'Latîn, et l'peupl'ye pâlait l'Nouormand, tch'était - d'après John Patriarche Ahier - un mêlange dé Gaulois, Frank et Norvégien. Mais i' nouos dit qué par lé temps qu' Wace 'tait dans sa prînme, la langue populaithe c'menchait à s'franciser.
Eune chose est bein cèrtaine. J'dévons êt' ordgilleurs d'êt' dé la mème race dé Wace. Lé nom dé Vasse (Wace 'tait tout probabliément prononcé d'mème), péthînmé d'nouos jours, 'tait bein connu comme nom d'fanmile en Jèrri, et j'ai 'té à l'êcole auve des Vasselins, un nom probabliément diminutif dé Vasse.
À La Côte, les Jèrriais sont supposés êt' Angliais. Ch'est viyant qu' la maison d'conmèrce des Robîns 'tait considéthée Angliaiche viyant qu' Jèrri est un apanage dé la Couronne dé l'Angliétèrre. Mème les noms Jèrriais des empliyés n'empêchent pon les Cannadgiens-Français d'les considéther Angliais. Dans les provînces Angliaiches du Cannada, et ès Êtats-Unis d'Améthique, ch'est autre affaithe. I' craient qu' les Jèrriais à cause dé lus noms sont d'souche Française, et ch'est l'dgiabl'ye à confêsser à lus faithe comprendre qué jé n'sommes pon ni Français ni Angliais, mais Anglo-Nouormands!
Ch'est assez drôle qué la mâjorité d's Améthitchains n'ont janmais ouï pâler d'l'Île dé Jèrri. I' n'sé sont janmais d'mandés l'originne du nom “New Jersey” ni dé ioù qu'la vaque Jèrriaise est provenue. Quand nou lus pâle dé “Jersey” i' craient tréjous qu'nou veurt dithe “New Jersey”. Nou-s-est don oblyigis d'lus conter l'histouaithe dé La Nouormandie du temps du preunmié Duc jusqu'à la Batâle dé Hastings, et comment qu' l'Angliétèrre pèrdit la Nouormandie Continentale pus tard mais qu' les Îles dé La Manche èrfûsidrent dé s'soumettre au joug dé la France et restîdrent fidèles à la Couronne d'Angliétèrre, lé Rouai ou la Reine étant Duc de Nouormandie dépis 1066, et qu'en conséquenche nouot' race est vraiement ordgilleuse d'êt' Anglo-Nouormande!
George d'La Forge
Viyiz étout: