Les Pages Jèrriaises

Jèrriais, ma langue

 

Jèrriais, ma langue - tch'est qué m'est l'împortance dé la langue? La rêponse est sîmpl'ye.

Preunmiéthement lé Jèrriais est eune langue Normande, ieune des pus vielles variêtés dé la langue d'oïl, qui, coumme oulle a êvolué à travèrs les siècl'yes a ieu eune grande înfluence sus lé dêv'loppement dé la langue Normande et du Français modèrne.

Deuxièmement ch'tait la langue dé mes anchêtres et auve lé pâssage du temps oulle a joué un rôle bein împortant dans lé dêv'loppement des attitudes du monde dé Jèrri à la vie en général.

Traîsièmement et lé pus împortant dé touos, oulle 'tait la langue pâlée dans nôtre maîson, à l'entou d'l'âtre, à la tabl'ye, à l'églyise et quand nou faîsait les vîsites hardi bein împortantes ès couôsîns dans la campângne; n'împorte iou, tréjous la langue fut la même - Jèrriais.

Ch'est pouortchi, i' n'y'en a pon dé doute qué, quand j'tais êfant mes réchinnes fûtent împliantées profondément dans la tèrre dé Jèrri et dans nôtre langue.

La langue èrprésentait eune môde dé la vie et en même temps pouor mé, oulle a ieu eune grande înfluence sus man caractéthe et mes pensées. En êffet, la langue est m'n héthitage, tout pliein dé mémouaithes, tchique chose qui est difficile à explyitchi en deux-trais patholes.

Mais, tristément, quand j'tais mousse, douochement, si douochement les Jèrriais en partitchulyi "les hoummes d'înfluence" c'menchîtent à changi lus idées entouor l'împortance dé la langue. Eune grand' partie dé Jèrriais pensaient qu'i' n'tait pon "à la môde" à pâler lus propre langue. Tchi niolîn!!

Heûtheusement les temps et les attitudes changent, et à ch't'heu j'pouvons vaie eune èrnaîssance d'întétêt dans chutte vielle et ancienne langue.

J'espéthons qué les généthâtions à suivre es'sont ordgilleurs dé pâler lus langue nâtive.

Et, quant à mé, ch'est eune langue tchi rest'tha auve mé pouor tréjous.

 

J.R. Dénize

 

 

Viyiz étout:

 

Les Pages Jèrriaises