Nou m'a conté qu'un janne drôle,
tchi v'nait de r'vénîn dé l'êcole,
avait oublié san Jèrriais
et né d'visait pus qu'en Angliais;
Mais il arrivit eune affaithe
tchi li rafraîchit la mémouaithe.
Ch'était dans la saison du fain,
i' t'nait un râté à la main;
atout san pid faîthant tchique luthe,
i' s'rencontrit par aventuthe,
qué l'râté v'nant à s'èrdréchi
et à la fache l'adèrchi
assez dû d'un bouan coup du manche,
i' pèrdit aussitôt cont'nanche,
et r'trouvant sa langue d'avé
s'êcriyit: "b............... dé râté."
Nou n'entend qu'chein qu'nou veurt entendre,
nou n'prend qu'chein qu'nou veurt prendre;
nou n'vait, nou n'sait qu'chein qu'nou veurt,
mais l'întéthêt janmais n'meurt.