Les Pages Jèrriaises

L'Histouaithe du Mangni d'Sanmathès

Lé nom du Mangni d'Sanmathès veint du fait qu'la tèrre par là-bas 'tait un mathais salé (“salse marais”).

Dans les touos vièrs temps nou s'tchait la sausse pouor fabritchi l'sé - tchi 'tait hardi împortant pouor présèrver la nouôrrituthe avant l'învention des frigos.

Nou dit qué, même au dgiêx-neuvième siècl'ye, lé tèrrain 'tait acouo si ieauseux qué ch'tait pôssibl'ye d'aller en Ville par baté - au mains eune partie du c'mîn - sans aller en mé.

Mangni d'Sanmathès Lé colombyi du Mangni d'Sanmathès est l'pus vièr en Jèrri. I' fut bâti au 11e siècl'ye et contcheint 500 pliaiches pouor les pigeons. Temps pâssé, seul'ment les Seigneurs avaient l'drouait d'garder des pigeons et i' bâtissaient don des colombièrs.

Les preunmièrs propriétaithes du Mangni 'taient les de St. Hilaires ès 12e, 13e et 14e siècl'yes. Tout chein tchi reste d'lus temps est la crypte d'la chapelle qu'nou peut vaie souos l'Mangni. Les Payns et les Dumaresqs t'naient l'Mangni jusqu'à 1734 (nou-s'y vait eune pièrre d'mathiage tchi mèrque l'unnion des deux fanmil'yes), et pis les Hammonds et les Mouothants l'acatîtent à lus tou.

Les bâtisses du Mangni ont 'té changis avaû les siècl'yes ès mains des difféthents Seigneurs, et la grande maîson du Mangni nos présente eune fache d'élégance.

Lé Mangni 'tait fanmeux pouor ses gardîns même y'a trais chents ans, mais les gardîns qu'nou vait achteu sont l'travas d'un Angliais, Messire James Knott, tch'acatit l'Mangni en 1924. I' fut né en Angliétèrre en 1855 et fît sa forteune dans la marinne marchande.

Quand Messire James Knott acatit l'Mangni, i' c'menchit à plianner les mangnifiques gardîns et empliyit quarante gardinnièrs pouor faithe tout l'travas.

Înfluencé par l'Orient, il înstâllit eune cauminne Japonnaise et un gardîn dg'ieau auve des statues Orientales. Les vîsiteurs d'achteu aiment vaie l'gardîn enmuthailli et l'gardîn ès hèrbes étout, tch'est pus récent.

Mangni d'Sanmathès L'Mangni d'Sanmathès est ieune d's attractions d'Jèrri pouor les touristes, et y'a d's annimaux et tout pliein d's activités et des fêtes duthant l'Êté.

En 2002, ch'est la Fête des Rouaisouns tchi veindra y cêlébrer la langue et la tchultuthe des Nouormands - et viyant qué ch'fut les Nouormands tchi fondîtent lé Mangni y'a pus d'neu chents ans, ch'est bein natuthel.

 

Viyiz étout:

 

Les Pages Jèrriaises