|
D'un co not' beusse s'arrouit: la fil'ye au vèrt chapé fut fliantchie contré mé; j'm'êcantis à lî faithe l'amour à tigue dé corps, car pouor l'heuthe du dînner lé monde s'n'allait s'ag'ver par eune dgèrre nucléaithe. Ou halit san chapé, s'y mînt à flieur dé bras. Quand l's aut's apprîntent qué tout s'sait passecrit pouor méjeu, au run d'rester chotchis, i' foutotîtent en cas - même lé contrôleux fut faithe la carre au cacheux. Pus tard, j'feûnmes ahontés d'nos r'vaie sus l'viage d'èrtou; mais j'dis qu'ché s'sait pitchi, si l'monde n'a pon finni, d'n'en haler pon l'profit en faîthant l'feint tréjous. N'èrv'là les pâssagièrs à r'faithe lus foutot'tie. À méjeu nou s'ent'-graie acouo en faîthant l'feint qu'la fîn du monde veindra - véthe, châque jour nou-s'y veint.
|
Viyiz étout: