Lé Vièr Fort dans la Baie d'Saint Aubîn est un mèr bein connu, et nou dithait ofûche qué si l'Châté Lîzabé endrait à l'aut' but d'la Baie n'tait pon si mangnifique, lé Vièr Fort, li, s'sait la glouaithe d'la veue pannoramique. Tout coumme lé Vièr Fort a mains d'histouaithe qu'lé Châté Lîzabé ouaithe qu'i' sait pus vyi: les preunmié fortificâtions d'l'îlet fûtent grées dans les 1542. Nou-s'y bâtit eune tou à canons.
Un siècl'ye pus tard la tou 'tait dans un triste êtat. Quand la Dgèrre des Rouoyaumes quémenchit, des forches parlémentaithes vîntent gouvèrner l'Île. Lé Lieut'nant Gouvèrneux parlémentaithe quémandit qué nou r'grîsse la tou. En 1643 la tou fut entouothée d'remparts pouor en dév'nîn un fort pouor la preunmié fais. Mais ches neuves fortificâtions né fîtent pon du bein pouor les parlémentaithes: raîque un mais auprès l'èrgraiethie l'fort fut prîns par surprînse par des Rouoyalistes Saint Bréladais.
Au mais d'Avri 1646 lé Prînce dé Galles, Charles, arrivit en Jèrri auve sa siette. I' vîsitit l'Fort l'12 dé Mai 1646 pouor înspecter les d'fenses. Lé Prînce baillit des sou pouor renforchi les fortificâtions et l'Fort fut r'grée acouo auve acouo des remparts et la tou fut haûchie. En 1651 quand les forches parlémentaithes arrivîtent pouor r'prendre l'Île, Messire George dé Cart'ret et ses hoummes lus r'fugyîtent au Châté Lîzabé et l'Fort dé Saint Aubîn fut laîssi ès forches d'l'enn'mîn.
Eune caûchie au Fort fut c'menchie dans les 1680, et chutte caûchie fut amendée tchiques fais pouor la fîn du dgiêx-huitchième siècl'ye. En 1730 les fortificâtions fûtent modèrnîsées.
Un grand changement prînt pliaiche 1838-1840 quand l'Fort fut r'grée pouor enfachi la m'niche d'la nouvelle technologie: les stînmes. Pus d'run pouor les canons et d'l'arreun'nie pouor l'artil'lie fûtent proposés, et parmi les travaux entréprîns nou-s'agrandit lé louogement ès soudards - mais viyant qu'nou r'nonchit l'usage du Fort d'vant qu'eune dgèrre pûsse s'adonner, chu louogement n'tait janmais fait sèrvi coumme ch'tait préveu.
Lé Fort 'tait loué coumme résidence pouor bein d's années. Lé Fort fut acaté par l's Êtats d'Jèrri. Duthant l'Otchupâtion l's All'mands l'èr'renforchîtent.
Achteu l'Fort est un centre dé sports et d'activités, sustout pouor les jannes gens.
Viyiz étout: