Les Pages Jèrriaises

La Saint-Osbinaise!


Air: T'en souviens tu? disait jeune fillette!

Qui biau matin, tout est doux et tranquille,
Le Ciel est bé, deshallons nos couleurs!
Chest fêste angniet pour nout'noble p'tit'ville,
Descothons la de louothi z-et de flieurs.
Ready cannons et tambours et trompettes!
Résjouissons esfants de Saint-Osbin,
V'nais accorder cliairons et sérinettes
Préparous tous pour un bouan rigodin!

Chanton les Gass chu biau fin luminaithe;
I sort jioyoeux pour nos escliairir tous;
Viyis partout ses guiamans de lumiaithe,
I veut entrer, i veux brislir siès nous.
Erchévons-le z-ov tambours et trompettes;
Qu'y règne en Rey sus les fils d'Saint-Osbin,
Welcomons-le z-au son des sérinettes
Chest nouot Solai, chest nouot pus grand ammin.

Allons garçons, vénais touos à la feste,
Chantais m'sesfants et siyons touos jioyoeux,
Marchons, festons ov la musique en teste,
V'nais admither de nouot Gass les biaux foeux.
Tithais canons, jouais tambours et trompettes
Resviltonnous esfants de Saint-Osbin,
Chantons d'accord au son des sérinettes,
Vive le Gass chest nouot pus grand ammin.

Aut'fais garçons, c'h'tait ichin la grand'ville
La grand'caouchie et le quai des Marchands,
Chétait là bas qu'les batiaux de noutre Ile
V'naient se r'poser de l'hivé z-au printemps.
I r'venaient tous dé nouos runs de Terreneuve
Ovec nos fils, nos clerks et nos mat'lots;
Remplir l'gousset du bouan Moussieu Villeneuve,
Stockir Gerry de mouthue et de nos.

Construis un port, agrandis tan commerce,
Fait un Railroad et bastis des maisons,
Va souos Gniermont, qué la Rail le traverse
Tout nouot payïs profitt'a de ses fonds.
Gerry joindra tes tambours, tes trompettes
Tu s'sas jioyoeux chier petit Saint-Osbin.
Je chant-tons tous ovec tes sérinettes
Dans ten Esden, dans ten heusroeux gardin.

Oh Saint-Brolard'! que ta ville prospère.
Chest d'un rimmoeux, iun de tes viers soudards!
Le d'zir ardent, le voeu le pus sincère!
Gravons-le bain sus tes biaux Estendards!
Ma Lyre a joint z-et tambours et trompettes
Pour lé chanter tan noble Saint-Osbin,
Oulle est d'accord ovec tes sérinettes,
Pour te baillir un fammoeux rigodin.

Esluminons! - qui millairs de chandelles
Chest ti dan bé? - qui pourtrait égaluant!
Vait dan man Ph'lip - chest com' autant d'Estelles!
-Vlà l'Génétha! - vlo qu'y passe en saluant.
Les fire-works, le cannon, les trompettes
Et les houras! - qui daufait casrillon!
Les amouotchoeux et les jennes drinettes
S'en vont danser le famoeux cotillon.

N'toublions pas jioyeuse et belle feste!
Jé t'erprierons d'ervenin touos les ans,
Pour nouos guider au camp de la conqueste,
Oué jes'sons tous, heusroeux et triomphans.
Touos d'un accord ov tambours et trompettes
J'invoquérons nouot bouan grand Saint-Osbin
Jé t'welcomrons ov Lyre et sérinettes
Et je dans'sons un fammouex rigodin.

Tout est bonheur dans nouot modeste ville
J'viyions partout des millairs de prom'neurs,
De Saint-Hélier, de touos les points de l'Ile.
I sont festais par nos bouans Gouverneurs.
J'les salueuthons ov tambours et trompettes,
J'les invit'tons d'ervenin touos les ans,
J'les welcomrons ov gass et sérinettes
J'les décoth'thons de victouothioeux ribans.

Saint-Osbinais j'allons finir la feste
Houras! Hourras! chantons "God save the Queen!"
Marchons, allons, chantons, musique en tête, -
Qu'menchis, - bravo - v'là quest bain vaisin Dean.
Chant mélogieux! - oh subliesmes trompettes!
Hymne divin, céleste alléluia!
Qu'en finissant nos concerts et nos festes
J'offrons ès Cioeux pour noutre Victoria!

Oméga

(Lé gaz fut întroduit à Saint Aubîn l'24 d'Juîn 1864)

 

Viyiz étout:

 

Les Pages Jèrriaises