Mousieu, - Vos plierait-i trouvé une pliaiche dans votre gazette pour la lettre qué j'voudrais adressé ès Trinnetais, et j'vos lé d'mande d'autant pus qu'nou m'a dit qué notre ammin Jean n'en voulait pas, qu'est une mennetie bain faite si jammais y ien avait iune.
Mes Garçons, - Ou zêtes des gaillards qui n'êtes pas bêtes à la maintyi, ou zavais môtré qu'ou pouvais bain vos dêtuollyi d'affaire quand où vos y mettez, chest pourqui j'ai confiance quou sérez bain qui faire Mardi qui vaint. Ou z'avez deux hommes dévant vous: iun un jeune homme et l'autre qui qu'menche dêjà à s'grizi. Ch'est à vous à dire léquet des deuz qu'ou zérais. Quand à mé ou savez dêjà bain qué l'sien qui m'passe lé pus près du tcheu est notre ammin Jean Dannié, qui soulait être Sergent dans notre compagnie, et qui vos a fait l'honneu d'être votre Chantegni yia dêjà une pose; ainssa d'vant qu'ou votais pour li ou pour l'aoutre d'mandais lu deux-trais questions et qui l'y répondent comme des hommes. Ont-y idèe d'voté pour une taxe sus lé p'tun, car ou savais que l'jeane digot qu'est Connêtable en ville a dit qu'il en proposera iune. Si autchun d'lus deux votent pour, jé m'tchains siez nous ou bain j'irai voté pour mé même car chest une chose abominable qué d'voulé taxé iune des millieures consolations d'la vie; aviez d'la peine un miot qu'est qu'ou frez, ou z'irais p'têtre à votre bouanne femme pour vos consoler, et bain, offuche ou vos cliutte une cliamuse, et p'têtre ou zen porterais les merques, ou bain ou z'êprouverais p'têtre un bouan verre de vier cidre qu'a 'tet dans un barrique à romme pour trais ou quatre ans, ou un bouan verre de cuognac; mais j'vos dit, et j'ai êprouvè tuos les r'mièdes, êprouves la pipe, hallez un miot dut au qu'menchement, et pîs duochement, ou z'oublierez votre paine, et ou crérez qu'ou s'rais dans l'paradis des Turques, ouest qu'les femmes vos griment les yiers. Une taxe sus le p'tun vraiment! I faut que ch'tomme la ait la brélue; i n'est pas bain dans sa tête.
Une autre chose; jé voudrais et tout savé pour le hâvre d'Rôzé, sont y prés tous les deux à l'supporté dans l'Zêtats, sont y prêts a d'vîsé pour si bain comme dé voter pour. J'avons dêjà une belle embâcle dans l'Zêtats pour Connêtable, ch'est assez pour auqieune paraisse, même pour la nôtre, car ou savez bain qui n'yien a pas une autre itelle en Jerri, ni hors de Jerri, St. Martin dans ses piéres jours n'était pas diez fais si piére, car oquo yieux y s'entre capuchaient comme des sictins, mais y n's'entre volaient pon.
Et bain pour en fini, comme j'vos ai dit, ou z'avais deux hommes dévant vous: iun a promins dé voté pour un hâvre à Rôzé, et j'sis bain seux qu'il est trop l'ammin des pauvres pour voter pour une taxe sus lé p'tun; ou l'connaissiz bain, san nom chest Jean Cabot; et pis ergardez tuos les bouans p'tits fricots qui nos donne. L'autre n'a pas promîns grand chose, à chain qu'nou m'a dit; chest un aussi brave homme comme y iait dans aucune pâraisse, il est jenne, et mé jé n'mé soucis pon trop des jennes, y nos passent nous, minsérables viers sus la grand route de la vie, et nos prennent tuos les prix, un coin au chumetière et une bêquie d'terre est tou chain qui nos reste.
J'crai qu'jen ai dit assez pour vos môtré d'qui bord voté; quand a mé, y n'ia qu'un homme pour qui j'voterai, et s'ou r'gardez bain, Trinnetais, ou m'verrez iun des premiers a voté, montè dans ma bouanne blieue à jaunes boutons, et ma voix essa donnèe pour Jean Dannié Cabot, des Canreaux. Espérant, mes garçons, qu'ou zêtes dé charme,
Je reste, vot' serviteu,
Mouise du Buolé.
J'allais oublié quique chose, chest qué si ou mettez Jean Députè, ou votetez pour mé pour Chantegni.
Vive Jean Cabot! Bravo Jean Cabot!!
Jersey Independent and Daily Telegraph 10/1/1863
Viyiz étout: