Sèrvice Annuel, 1975
Dînmanche, lé 29 dé juîn, dans les 240 membres et autres lus rêunîtent dans l'Églyise dé St. George à St. Ouën, pour lé sèrvice annuel. D'vant c'menchi lé sèrvice lé Sieur Henry Le Gresley dit dé bein tristes nouvelles du décès du Sénateu J. J. Le Marquand et offrit eune priéthe à sa mémouaithe.
Auprès, lé sèrvice continuit auvec d'autres priéthes et “Notre Père” fut chanté par le tchoeur et la congrégation, auvec lé Connêtabl'ye G. A. Le Breton à l'orgue.
Lé preunmyi cantique était “Je veux chanter dans un nouveau cantique” et pis lé Président, lé Connêtabl'ye W. J. Tomes, liut la preunmié léçon, d'Ézéchiel 34, vèrsets 11 à 16, lé préchain cantique étant “Soleil de Justice”. Auprès, la Dlle. F. Hacquoil liut la deuxième léçon, St. Matthieu 16, vèrsets 13 à 20, les deux léçons ayant 'té traduites en Jèrriais par deux des membres. Lé traîsième cantique 'tait “Semons dès que brille l'aurore”, et pis lé Sieur Le Gresley fit les priéthes.
Lé cantique dévant lé sèrmon “O Glorieux Anges du Ciel”, avait 'té întèrprété par Moussieu George F. Le Feuvre, et fut hardi bein chanté par tous.
Lé Sieur Le Gresley fit lé sèrmon, et san texte était prîns dé la deuxième léçon, “J'té dis qué tu'es Pièrre et qu'j'bâtithai m'n Églyise sus chutte pièrre-là”.
Y'a deux ans ch'tait la St. Jean quand lé sèrvice eut lieu à La Trin'té et chu jour ch'tait la St. Pièrre tch'est fêté par les Églyises Anglyicannes. Pièrre 'tait pêtcheux sus lé Lac dé Galilée, qu'est deux fais la grandeur dé Jèrri. J'pouvons comprendre les paraboles bein mus quand j'savons la grandeur dé la pliaiche concérnée. Ch'tait à Pièrre qué lé Seigneur donnit la pus importante tâche.
La Bibl'ye est êcrite par du monde ordinaithe. Lus vie était coumme anniet sus bein des sens; y'avait du travas, des meurtres, des dgèrres, etc. La Bibl'ye est aussi modèrne anniet coumme oulle 'tait y'a chent ans, et si St. Pièrre n'avait pas vêtchu j'n'éthaîmes pas ieu d'Bibl'ye. Ch'tait li qui racontit à St. Mar les preunmié histouéthes êcrites. Pièrre racontait les histouéthes et les autres les êcrivaient.
Pièrre était bein savant. Les pêtcheux savent entouor lé temps, lé bouais pour bâti un baté, la mé, etc. I' 'tait mathié; j'avons entendu pâler dé sa belle-méthe, car quand Jésus fut là ou n'pouvait pas lé sèrvi car ou 'tait malade, et I' la r'dgéthit. Il avait un fréthe, André.
Pièrre était maître pêtcheux et avait du monde en travas pour li. Ch'est là pourtchi qu'i' pouvait suivre lé Seigneur. Dans chu temps-là les êcoles étaient dans les synagogues, ou un appartément à côté. Dans les p'tits villages ch'tait dans eune maîson, pour les garçons, les filles étant oblyigies dé rester siez ieux à faithe lé travas d'maîson.
Pièrre était la sorte dé pèrsonne qui disait chein qu'i' pensait. I' 'tait lé seul des douze qu'avait lé couothage, mais pus tard i' dênyit san Sauveur, mais l'suivit quand i' fut jugi. Quand i' rêalisit tch'est qu'il avait fait i' pleuthit. Auprès la Rêsurrection i' fut l'preunmyi à suivre Jésus.
J'dévthaimes nos rappeler du monde qui sont hors; i' nos ont montré la vie chrêtchienne.
La collecte fut prînse en faveur dé l'églyise, et lé cantique “Que la terre et les cieux” fut chanté, et pis lé Recteur prononcit la Bénédiction.
Viyiz étout: