* * *

Quand not' fille avait portait ses souyiais pour être ergrès, Joe lis dits: vein les ramassai vendredi au sé, y s'sont prêts pour té.

La v'la allait l'vendredi au sé. La cordounnie tait remplyie d'hoummes a paslait d'spring cleaning. Souky du Vivi tait là; y tais a l'excité touos l'hoummes, tous, contre l'spring cleaning.

Souky tait en faveur yi. Dans un temps la v'la presque enragie, ou lus dits: l'spring cleaning a sauvait la vie a des milles persounnes. Y'ieun d'hoummes lis dits: ch'est chein qui fait q'y'a tant d'monde sans travas, les gens vivent si longtemps.

Souky dits: si t'chtai mé a en décidai j'frais un grand creux et touos l's'hoummes qui sont contre l'spring cleaning j'lais mettrais d'dans, et j'lus estreuillais eune bouctais d'arsénin sus la tête.

Missis Gargni empoigni Souky, et l'emmnit. Y tait temps! Yieun d's'hoummes criyit: Missis Gargni, sprayais Souky avec d'l'arsénin, sen chervé est affectait, oulle a des p'tites Beetles dans les ch'veux, y s'en vont lis q'iergi la tête, in l'y restera pas un ch'veu. Un autre dit: Souky s'ra bald-headed d'vant qu'arrivait au Vivi.

Joe les laissait, yi avait occuo mà dans sen bras.

Siz Joe l'Mougni, lus grand mitheux a tait d'pichi.

Siez Adam L'Huquet lus biau grand portrait d'la reine Victoria quand ou desbertchi en Jerri a tait bûchi.

Siez not't' garçon y n'ont yieu presque rein d'pichi, un chucri et deux piats a fruit.

Mais siez Maître Jacques Tourgis, lus biau tapis qu'avait couatait presque vingt louis fut mins en bredelles!

* * *

Par une magnifique jour, pas un nuage, y faisait grand caud. Missis Tourgis dits a Marie: y faut deshallait l'tapis pour l'airai. L'Maître et mé j'nos s'nallons nos proumnait; si l'temps s'couvrait et q'yierait autchun seigne dé pyis; tu rentreras l'tapis. Oui, Oui! Madame!

D'vier deux heures et d'mie, Marie s'en fut ermué l'bestchias dans l'clios d'bas, et trouvi Louise Averty, et les v'la a paslait du "Spring cleaning." Marie n'tait pas praissie. Yeun des viaux qui tait dans l'estable abannonni et lé v'la a mangi l'tapis. L'grand tchen d'Terre-Neuve lé vit, et s'en va yaidji; le viaux tait tout raisjoui, les v'la a s'entre yaidji - ieune hallait d'un but, et l'autre dé l'autre, ils l'minchirent, l'saccagirent lus boulais d'sus et l'triyais du mus qui pouvaient; quand vint un temps l'tapis n'tait q'des débris, ien restait a peu près grand coumme un d'vanté, et l'tchen l'emporti et alli l'enfoui dans l'bas d'un côti. marie rencontri l'viau tchi tait a jibait dans un bêtchait d'patates; la v'la souentre mais pas moyen d'lattrappé, y's sauvait d'un clios dans l'autre, et pour eune heure et demie y fit couaure Marie; Quand y fut rentrai dans san cottin, Marie tait a but ou n'en pouvait pus. Et bein! ou dits: il est quatre heures et démie, j'm'en vais rentrer man tapis. Quand ou vint a vais pour san tapis, j'tai d'des débris; Marie faillit saisvannit.

Quand Maître Jacque et sa femme ervinrent et q'Marie lus dis pour lé tapis, y furent coumme paralysez et s'mindre a s'entre ergardait, et les v'la tous a pieurrai.

L'bouon houmme Maître Jacques dit: pour mé, j'voudrais vais tout l'spring cleaning au fond d'la mé pour jammais n'en rouait paslai. Missis dit: mé, j'voudrais vais tous les tchens et viaux dans la 'Saline Bay" pour jammais n'en r'vais. Marie dit: "moi- je dis! quand on veux sortir un tapis d'un si haut prix; on ne devrait pas aller se promener, on devrait en soigner, comme cela, on aurait des veaux, des chiens et un beau tapis et tout le monde seraient réjouis, au lieu d'être à pleurer sur ce qui autait pu être évité."

Eh bein s'fit Mess Tourgis, ch'est ocquo la Marie qui a l'pus d'avis.

* * *

Siez Rachel Larbalestchi san bouan suit a tai trébutchi; oul avait ieune fmme a yaidyi et oulle avait emmnait san mousse avec yi. Tandi qui taient a essecoué l'tapis; l'mousse trouvi eune pottais d'peinture et un pisciaux et peignit l'suit. Quand y r'vindre dessecouer l'tapis l'mousse tait d'ouoyi d'pis la tête es pis; et l'suit tout ruinait. Missis Larbalestchi failli sesvenni, ou faisait pitchi.

* * *

Siez not' neveu Clem, yen eu du tripo a lus spring cleaning; les filles dirent à lus memmée: faut avé Jane a nos aidji a not' spring cleaning, chest là la hardelle pour vos touanné un mainsnage, not'r' spring cleaning n'sait pas long. Nen, m's'esfants, mais y pouaurrait être bein large. Jane est trop brusque. Enfin, faites coumme ou souhaitrez, s'fit la bouonne femme.

Au jour dit, Jane arrive. Allons! s'fit Jane, faut s'y mettre, pas d'lendottis.

La bouonne femme dits a Jane: faudra ergardait bein a ma bouonne armoithe française, tu vé bein Jane les biaux panniaux kerevais. Sus un pannait "le déluge" et sus l'autre "l'Arche d'Noé." Faut ergardait bein d'n'pas la grimmé. Jane dits: j'allons la viedji, et touos l's habits et l'grand portrait d'acotait, j'allons mettre tout sus l'liet; et couvri tout avec un lincheu, et pis j'la carrerons pour netti et esposté l'szérangnis endriéthe.

Ah! s'fit la bouonne femme, faut pas la bouogi car oulle a un pi amaintchi descollait, et ou pourrait s'canté.

Jane dits: n'qumenchis pas à nos embêté! Yeune des filles lis dits: "memmée, va-t'en." Et bein oui - j'men vais car jé sis a la vais, faite d'vote mus m'e'esfants.

Quand la bouonne femme fut horte, Jane dits: y vos embête chest viers là, dans le même temps, ieune des filles vit eune pétite souoris qui tait annichie contre ieune des pis. Vite! l'ca s'fit Jane. Un biau persian raide bouon a la vermeine. L'ca manque la sourie. Jane qu'avait sa bringe estprouve a la squeezi contre ieun des pis d'larmoithe; l'pi estcapi, l'armoithe tchullbuti, Jane estprouvi à l'aarténin; ou s'desfits l'bras, le liet fut d'pichi, et eune portrait d'la reine Elizabeth, et eune montre enveloppais dans du papi pour l'ptit Johnny; d'sen parrain Mess Le Dain, les panniaux d'larmoithe tais minchis, l'ca eût les sens touannais, volit l'travers d'la f'nêtre, tchi sus la greenhouse, passe l'travers d'eune ozaine, lé v'la dans la citerne et fût niet.

Jane s'en fut siez yi et les laissi a lus desbrouilli.

J'nai pas bésoin d'vos dithe tchain q'la bouonne femme lus dits, quand ou vit l'désordre. Seulement, ou lus dits: ous abrégis mes jours m's'esfants, y faut pensait a m'surait la largeur. Vère memmée, s'fit ieune des filles, mais faut m'surer la longueur dévant la largeur. Vère ma p'tite, mais faut m'surer kes deux d'vant q'menchi.

Quand l'Roi et la Rein vaindrais en Jerri siez Clem l'spring cleaning est fini, mais l'dernié mot n'est pas sus en être ouï.

Tchique jours après, Jane vins les vais, oulle avait l'bras tout enfiait. Missis lit dits: tu nos en fis eune messe l'autre jour; ma bouonne armoithe est compiètement ruinais.

J'en ai grand r'gret s'fit Jane, pour l'amour dé men bras. La bouonne femme lis d'mandit s'oulle avait fait tchicque choses à sen bras. Oui, j'yai mins un pousso d'ortchis et d'rhubarbe; mais v'la qu'in ya fait d'rein. J'tai l'Frank qui m'avait r'kémandait chounna, mais tchiqu'uns m'ont dit q'chest un farceux.

Savous-bein q'lannée passée j'fut a un tas d'maisons lus aidji a lus spring cleaning, et persounne de yieux n'mont erdémandai ch'tannais."

"J'men vavis pas," s'fit Missis. Et ieune des filles lis d'mandi s'oulle avait tait tchque bord tch'tannais? Oui, j'tais siez d'z'Angiais qui sont v'nus d'meurait par siez nous; j'avait onze appartements a spring cleanait.

Et pis ichin la deuxième maison.

Yieune des filles lis d'mandit. D'pichi-tu tchique choses siez l'z'Angliais? Oui, l'premi jour yavait un washstand avec lé haut en marbre, i'n'pouvais pas l'bouogi à men goût, j'mins m'nespaule souos eune carre et v'la l'washstand qui t'chulebute, canne et baisine, tout fut minchi; la slab dé marbre passit l'travers du pianchais, et cracque en deux. In criyais pas qu j'savais l'angliais; y dirent: "What a silly little woman," et a quatre heures im renvirent siez-mé, im payirent et j'comprins qu'im dirent: "No more come! Finish."

J'nis fut qu'un jour et pis lé lend'main j'menvins siez-vous.

La bouonne femme lis dits: Et bein! j'tait bein un jour de trop ichin! et j'espèche Jane q'tuas apprins ta lesson.

J'n'apprends pas d'lessons Missis jen'vais pas a l'escole! j'tchiti à djix ans.

Memmée! n'ly pasle pas d'autre, s'fits yeune des filles. "Ch'est eune idiote."

Justement l'Clem entrit et dits: Vethjia tues eune vraie idiote, eune grande babaine. Chn'est pas vrai, j'nen sis pas ieune, eune idiote. ma pouarre Jane, s'fit la bouonne femme, t'une sait pas seulement tchest q'chest qu'eune idiote!

Jane, toute masrie dit: si! j'sai bein tchest q'chest q'eune idiote! car Frank mé là dit. Chest eune personne qu'à les mains piennes d'erfraideuses et d'verrus.

Les v'la tous prins a rire comme des bossus, Clem en t'nait ses côtais, et en bouffant, dits: Jane, quand tu r'vindras apporte-nous tan photo, et l'certificat d'docteu à Frank.



A "La Pulente" le spring cleaning n'a pon tait trop bein. Missis Taubert, un matin qui faisait biau temps, ou dits à Louisa sa servante et à la femme dé journais: j'men vais en ville et j'men vais prendre la "Jay-M. Tea," et j'ervindrait a quatre heures et d'mie. Ou s'escouerrais l'grand tapis! Quand la bouonne femme fut horte, Louisa dits: a la femme de journais, faut deshallait l'tapis, pour l'airai d'vant l'essecoué, faut l'traîné à la grève dus l'sabion; et tandit qui s'ra a airé j'irons s'crobbé la pantry. Né v'la l'tapis sus la grève. La femme dé journais fits ermertchi à Louisa qu'la mé montait.

Louisa dits: j'avons bieau l'temps! né q'menche pas a avait la pépis!

Quand la pentry fut scrobbais, né v'la nos gens allait cherchi lus tapis.

Y nageait! au paslais! q'yen eu eune scène quand la bouonne femme ervint d'la ville.

"J'nai pas bésoin d'vos l'explitchi, tout l'monde dé Jerri l'a ouï."

La bouonne femme tait enragie quand ou vit sen tapis et ou dits: l'annais tchi veint quand y m'en couotrait djix-huit chents louis; men tapis s'a' escouet sus l'dépôt a vraic.

La femme de journais fit un brai et dits: Ah! j'vos en pris! n'allais pas despensé djix-huit chents louis! les gens diront qué s'sait eune vraie folie. Louisa et mé j'pouorrons vos l'essecoué pour chent louis. Nennin! s'fit la bouonne femme, j'lerrait sans cas essecoué à Gouaray!

Louisa ly dis: j'vis djernis y vaux en couotera pus d'chent louis s'oulle l'avez essecoué à Gouaray, puissequ'ou t'nais a l'avé essecoué sus un dépot à vraic.

J'acons étout ieu eune lettre d'nos gens à St. Ouen, l'spring cleaning a tait bein.

Les hoummes ont aidji a essecoué les tapis et disaient: faut nos despêchi pour fini avant foui.

Les femmes chantaient en faisant lus tripo, l'shoummes lus disais: Faut pas vos desrangi d'coutchi, nou peut bein s'grès pour eune fais.

Et y n'ont pas yieu rein d' d'pichi et châtchun tait resjoui. coumme disait nos gens, vaudrait mus en avait deux fais q'd'y mentchi ieune.

V'la l'esprit qui faudrait par tout jerri. Ou pouvais en jugi par tout chein qu'ou v'nais d'ouï.

"Si l'spring cleaning est bein condit châtchun peunt en jouï."

L'spring cleaning a qu'menchi quand Adam et Eve firent lus premi suit.

Et tandi q'sus la terre un d'scendant d'Adam s'trouvera jammais l'spring cleaning né finira.


J.M.
1933
 

Viyiz étout:

• La nettithie en Jèrriais

• Spring clean interferes with letters

• Spring Cleaning

• Lundi l'lavage

• Le Fatal Lundi

• Man Baromètre!

• Lé Lavage à la Merrienne

• Une 'Strike' à Portinfé

• Ph'lip does a spot of Housework .. and catches it from Merrienne

• Piteur complains of household management

• Y'a huiptante ans

• “Tu m'lav'thas et jé s'sai pus blianc qu'la né”