Lundi l'lavage,
Mardi l'reinchage ;
Mêcrédi l'sitchage,
Jeudi l'féthage ;
Vendrédi l'sèrrage,
Sanm'di en ville -
Et la s'maine est pâssée!
Chutte vielle arrînmée nos ramémouaithe dé la vie d'aut'fais et d'tout l'travas d'mênage tchi soulait otchuper eune grande partie d'la s'maine. Ach'teu j'sommes touos bein heutheurs dé n'êt' pus oblyigis d'aller au dou à laver à seule fîn d'faithe not' lavage - ni d'aver tout l'train d'caûffer l'cappeur.
Aut'fais nou soulait scrober et bouoilli l'lînge - et, coumme la p'tite arrînmée nos ramémouaithe, chenna pouôrrait bein prendre des journées.
Achteu, si nou-s'est à en jugi par les annonces à la télévîsion, y'a tout pliein d'tabliettes auve des boulets d'dans - ou sans boulets, ou auve deux couoches tout à fait spéciales - d'litchides à laver ou aut's chorchéthons qu'nou peut ajouôter à la machinne à laver d'la même manniéthe qu'nou-s'înmaginne qu'les chorchiéthes temps pâssé soulaient ajouôter lus hèrbes et ièrs dé lêzarde dg'ieau à la chaûdgiéthe.
Aut'fais les méthes soulaient s'mârri quand les mousses lus couvraient auve un tas d'salop'thie en jouant par les c'mîns - car ch'tait du travas à faithe lé lavage.
Ach'teu, s'nou peut en jugi par l's annonces à la télévîsion, les méthes sîmpliément souôrithent en r'mèrtchant qu'les avièrs ont trempé lus belles blianches quémînses auve d'la sauce dé tonmate dé d'ssus eune bouochie d'spaghettis ou la maîntchi d'eune pizza. Et pouortchi qu'i' font chenna? Bein, né v'là eune opporteuntité d'mouontrer l'efficacité du nouvieau litchide à laver!
En tout cas, la réalité n'est ni l'lavage du temps pâssé ni l'portrait tchi nos est donné par l's annonces à la télévîsion. Mais coumme tchi qu'nou dithait “drip-dry” en Jèrriais?
Viyiz étout: