Nou sait bein qu'lé vrai est bein utile pouor les fèrmièrs - mais j'trouvis l'vrai bein utile, mé étout, quand j'tais janne. Né v'chîn pouortchi: y'a d's années, quand j'tais à l'êcole, nou n'trouvait pon touos les savons et tout chenna auve les extraits d'hèrbes et pliantes exotiques qué nou vait sus l's ais des boutiques au jour d'aniet.
Nou-fait, à chu temps-là, pouor les garçons, nou n'osait pon faithe sèrvi rein d'trop parfunmé dé peux d'êt' atchûsé d'êt' eune manniéthe dé colîn-feunmelle. Y'avait du “Hai Karate” ou dé l'”Old Spice” et vraînment né v'là quâsiment tout.
Mais ès alentours des aûmathes à l'êcole y'avait des problièmes. La chose en 'tait qué d's aut's garçons soulaient “emprunter” les shampoos à lus parchonnièrs dans les douches. Tchil embarras d'trouver qu'san shampoo avait 'té “emprunté” d'même par les cheins ès dés longs! Et à san tou, nou s'trouvit oblyigi d'“emprunter” du shampoo dé d'dans l'aûmathe à san vaîsîn.... et chenna continnuait d'même.
Pouor dé mé, j'ai tréjous 'té întérêssi dans les produits natuthels et j'avais acaté du shampoo ès extraits d'vrai. J'réalisis bétôt qu'pèrsonne né voulait janmais faithe sèrvi man shampoo - même si j'en offrais, mes parchonnièrs né voulaient pon en prendre, en dithant, “Ah nou-fait mèrcie, ch'est trop bizarre.” Et jé n'tais janmais forchi d'muchi man shampoo coumme les aut's garcons: l's “emprunteurs” l'laissaient en trantchillité.
Achteu, i' sembl'ye qué tout l'monde - l's hoummes étout - a plieine la salle dé bain dé boutillies d'shampoo et d'onguents et d'crêmes ès extraits d'vrai, d'ortchies, d'cannevi, d'bananes, dé frâses, dé cocombres, dé m'lon, et d'touos les frits et lédgeunmes.
Coumme tchi qu'lé monde a changi d'pis l'temps d'mes grands-pathents et lus savon à côletèrre!
Geraint Jennings
Viyiz étout: