Lé bouonhomme George avait prépathé son p’tit bequeton pour y faithe des raves, mais la sethée de d’vant il avait ‘tait print dé ma dans l’dos et pour eune tchinzaine de jours, il fut obliégi d’rester au liet.
Un matin, quand i’s’sentait un mios mus, i’ print san bâton et i’s’en fut douochement jusqu’au clios mais, quand il arrivit à la bréque, i’n’en r’venait pas d’vaie toute la sèrcl’ye tch’avait cru dans si p’tit d’temps!
À chu moment là, san vaisin Bert Lé Masuthi arrivit à la brécque avec san tchian et i’s’mint à rithe en disant: Est-tu en train d’laissi tan clios à pêtre es coucous, don? Tu peut t’fichi d’mé si tu veurs, mais j’ai ieu un grand ma dans l’dos et i’s’en va faller que j’apprête man betchet acouo eune fais pour y faithe mes raves! rêponnit George. Er’garde-mé combein d’sortes d’sèrcl’ye qu’i’y’a ichin d’dans!
Les deux amins lus mintent à chèrfouolli dans l’clios et tch’est qu’ous criyiz qu’i’trouvitent?
D’la canmièthe, du paivre à j’va, d’la surelle, du bas, des mèrgots, des snîles, des tchèrdrons, des docques, d’s ortchis, du snichon, du vèrjus au dgiablye, du meurdron et d’l’herbe à mille noeuds!
Janmais d’ma vie j’n’éthais pensé d’en trouver tant! dit George.
S’n anmin li dit qu’i’s’en aller rapprêter lé p’tit bétchet pouor li chutte arlévée là- même et l’bouonhomme George lé r’merc’yi dé tout san tchoeu.
Lé lendemain, i’s’smit ses raves à la voleé et pus tard, quand san dos ‘tait èrfait et qu’i’taient bein l’vées, i’les sèrcl’yi avec sa large pliatte houette.
Sav’ous bein, qu’au s’tembre, les raves ‘taient si belles qué l’bouonhomme George, pouor la prémièthe fais dans sa vie, gangni l’preunmyi prix au Show!
Joan Tapley
Viyiz étout: