|
I' ya une fieur, une petite fieur Ov une couronne dorée; Et l'tou d'sa tête, signe de bonheur, L'auréole argentée. Ou'l est si élégante, si belle, Chutte fille de la chaleur, Q'la brise dé s'n'haleine tchedde l'appelle La reine dé toutes les fieurs. Ou la verrez dans les grande prés Oùest q'l'herbe craît fraiche et verte; Ou la trouvrez sus les fossés: Sans yi les routes s'raient d'sertes. La rousée duoches la couvre la niet, L'arrouse, la rafraichie. Et l'solet: à peine s'est i' l'vé Qui l'a vite embrachie. Nou vé sa fache dans l'maie d'Avri, S'êpanni tout duochment; “F'chin lé r'nouvé,” tout bas ou dit, “N'en êtous pas content? “Comme j'ai souffert ch't'ivé d'la né “Et d'la p'lie et d'la g'lée “J'cryais d'être morte, et ben noufait “L'solet m'a ranimée.” Les p'tits êfans en font lus jouée Ou lus suorit des prés Ils en ramassent des biaux touffés Pour donné à lus m'mée. Les p'tits agneaux galoppent dessus Ils en brinottent les fielles, Ch'est là la fieur qu'ils aiment le mus Ou lus paraît si belle. Piumtholles et g'zettes dans le' r'nouvé Sus les fossés fieuthissent; Et châque côti d'pipos est d'ghai, Toutes les êpines bianchissent. Mais ch'n'est pas tout car y'a oquo, L'long d'la route, dans chaque pré Sus san pi d'éméraude mergot, Qu'êpannis au solèt. G'zettes et pipos betôt s'en vont Les piumtholles suivent lus pas Nou vé lus fielles en passant l'long Mais n'ya pus d'fieurs hélas! Mais du r'nouvé jusqu'à l'hivé L's'êfans qui jouent, qui rient, N'sé lasse pas d'vaie et d'admithé Mergot lus fieur chérie. Messieux et dames passent à côté, Mais y n'la r'gardent pas; S'i connaissaient toute sa biauté, Ah! ils en f'raient pus d'cas. Dans lus gardins ils n'veulent pas vaie Mergot puor' p'tite fieuthette; N'importe pourtant là oùest qu'ou craît Partout oul est parfaite. Les papillons lus r'posent dessus, Ou fournis l'bourdon d'mi. Not puor p'tit mergot fait d'san mus Pour faire à tous pliaisi. Et mé quand jé n'tchèns pus à rein Et qu'tout est contre mé. Oh! ch'est alors que j'ai du bein D'la vaie en haut r'gardé. Ah! ch'n'est pas yi qui r'garde la terre Ou cherche miyeu q'chonna, Tréjous en haut san p'tit r'gard erre Bel exemple pour nous là. Eh! Lecteur si comme yi j'faisons Dans la joie, dans l'malheur, J'érons apprins une buonne leçon D'une modeste p'tite fieur.
Le Poëte “Des Ruettes”
|
Viyiz étout: