Les Pages Jèrriaises

Un rap Jèrriais

 

J'sis à St. Martîn à ces sé
pouor faithe un rap en Jèrriais.
J'vos dis bonsouair. Ch'est un pliaîsi
d'êt v'nu ichîn dé St. Hélyi

Lé rappeux d'la Ville dit bonsouair
à vous les jannes, à vous, les vièrs
Rapper, ch'est happer les bouans mots
et les mett' dans l'bouan ordre. Yo!

J'porte tréjous des leunettes d'solé
quand j'fais un rap. Jé n'peux rein vaie.
J'porte ma castchette, l'avant en drièthe
Et chein qué j'aime baithe, ch'est d'la biéthe
et dé l'ieau.

Toutes les bouannes gens dans la maîson
aiment bein mangi un mio d'paîsson
J'aime les baînis, vlicots et moûles
Mais pâler l'Jèrriais ch'est l'pus cool

I' faut l'pâler dans l'Vièr Marchi
ès Connêtabl'yes et au Bailli,
à la campangne, ès annimaux,
ès însectes et ès ouaîsieaux

Les rappeurs rapent. La mûsique joue.
Les vaques Jèrriaises, i' rapent étout.
J'vos l'dis: il' aiment raper un mio
toutes les séthées dans touos les clios.

En Ville, à Liberation Square,
I' n'y' a pon d'vaques ni d'fèrmièrs
Mais un tas d'jannes gens font du brit
J'fais des raps là étout, j'vos dis.

Man Doue! Né v'chîn un offici!
Eh bein, j'm'en vais. J'dis à bétôt
et j'prends auve mé man stéréo.

Chutte pièche fut donnée ès Séthées Jèrriaises d'l'Eisteddfod 2000 par Geraint Jennings coumme chanson non-compétitive - bein, un mio d'fanne pouor mouontrer qu'lé Jèrriais est capâbl'ye d'êt' fait sèrvi d'eune manniéthe pus modèrne et pus janne.

 

Viyiz étout:

 

Les Pages Jèrriaises