Moussieu l'Editeu
J'ai la bouonne nouvelle a vos annoncer aniet que ma bordeuse est pliantée. Chein qu'ch'est que d'aver un fils tch'a tréjous observe lé chinquieme Commandement. Si tout va bein, et tchin 'veint pas trop d'obgélées, j'espethe d'vos envier un p'tit fricot d'nouvelles patates à la fin d'Avri. La Merrienne est si contente de vaie la djobbe fini qu'ou m'a promint de faithe des crêpes Mardi tchi veint, et j'peux vos dithe que quand ma bouonnefemme fait des crêpes, ou fait tchiquechose tchi vaut la peine dé mangi, même si, en mangeant trop, comme j'fis l'année pâssée, nou-s-a à s'couochi avec un têrriblye ma dans les boudins.
'N'en v'la du langage' ou dit, 'un moussieu éthait pâslé de s'n estomac. Enfin, laissons chenna et pensons à chein tchi s'pâsse dans notre pâraisse. Tchi chance d'aver un Connêtablye comme lé Douard Vautchi, un raide bouon Chent'nyi comme lé Sieur Pirouet et l'Sieur Maurice Le Mottée comme candidat pour l'office.'
'Vèthe, damme' j'li dis, 'et n'oublie pas l'Hedley l'Bro, tchi remplièche lé Gordon J'valyi comme Protchutheux. Ch'est assez drôle, mais à Saint Ou je n'pouvons jamais nos pâsser d'ches Brôs-la.'
'Les Brôs' ou dit, 'sont comme les Le Feuvres, les Le Maistres, les Vautchièrs, les Viberts et les Pirouets. I'sont Saint Ouënnais pur sang, comme nou dit. J'allons àch'teu aver, avec lé nouvieau Chent'nyi, la miyeu plice d'autchune pâraisse d'la campagne, ch'est â dithe dé l'Ile.'
'Sans autchune doute' j'li dis, 'sinon, bein seux, la pâraisse de Grouville, ouèsque lé Sieur Brée veint d'être ré-élu Connétablye. Accordant à chein tch'i dit, Grouville a la miyeu police dé toutes les pâraisses, et I'faut féliciter l's électeurs.'
La Merrienne me r'gardit drait en fache. 'Es-tu sérieux?' ou d'mandit.
'Mais oui' j'li dis, 'tu'as veu dans la gâzette que ch'est d'même. Un Connêtablye tch'est un modèle à touos l's autres, deus Chent'nyis tchi font lûs d'vé si bein qu'la pâraisse peut s'graie sans l'aide d'la Police Salariée, et -'
'Arrète un mio' ou s'fit, 'lé Connêtablye dit qu'la pâraisse pouvait s'en pâsser sinon quand ou n'pouvait pas. Je n'crais pas que ch'est tout à fait la même chose. Quant ès Chent'nyis I'm'semblye d'aver liut tch'ils avaient yeu un accident derniéthement dans un auto, et que iun au mains avait 'té porté à l'hôpità. Je n'sais pas trop pour l'autre.'
'Chenna s'explique facilement' j'li dis, 'sans doute, I'taient en poursuite de tchiques criminels et I'taient prêssis. Pourtchi qu'tu ris, bouonnefemme?'
'Parsque j'ai pensé a tchiquechose tchi m'a fait rithe' ou raiponnit, s'egoufiant ocquo un couplye d'fais. 'J'si comme la vielle chorchiethe d'l'Eta, aut'fais, tchi riait pour un rein du tout. Enfin, Ph'lip, j'pense bein qu'ichin a Saint Ou j'éthons à nos satisfaithe d'aver la deuxieme miyeu police dé l'ile, et p't-être que pûs tard nou pouôrrait envier une députâtion à Grouville pour découvri comment tch'I s'y prennent pour aver miyeu qu'nous.'
'I'm'semblye, Merrienne' j'li dis, 'que tu t'fiche de monde.'
'Mé!' ou dit, ' oh grand doux nouffé. Ché s'sait ma derniée pensée! Mais, il est temps d'changi d'sujet. Tchesqu'i's'pâsse dans l's Etats?'
'Dans l's Etats' j'li dis, 'lé fameux projet sus l'traffic a 'té r'envié, et nou n'sait pas quand nou lé r'vérra. Y'a tchiques temps les Connêtablyes avaient 'té réunis pour considéther l'projet, et nou-s avait dit tch'ils en avaient approuvé, mais àch'teu i' disent tch'i' n'l'avaient pas comprint. Ch'est l'Peter Crill et l'Député Tomes tchi lus ont démontré que certaines provisions sont une attaque sus les drouaits et privilèges d'nos Connêtablyes. I'disent que les Connêtablyes n'avaient pas yeu l'temps d'les considéther. Il est vrai tch'ils avaient yeu d'pis l'année pâssée, mais, aprè tout, un Connêtablye a autre chose à faithe que d'pâsser san temps é lièthe un projet si long et si complitchi comme ch't'ichîn.'
'Et don' ou s'fit, 'il a la.. un Sénateur et un Député du Ville pour les mettfe sus l'bou.. qu'min, et pourtant nou n'v.. drait pas craithe que nos Connêtablyes sont si innocents comme tout chenna.'
'Les Connêtablyes n'sont pas élus pour siegi dans l's Etats' j'dis, 'mais pour administrer les affaithes d'lus pâraisses, tch'i'font raide bein, a les pren.. iun dans l'autre espécialement Grouville. I' n'taut pas bliaumer s'i' n'avaient pas qu'en votant pour lé projet cachaient un gros cliou dans l'coffre du Systeme Honoraire àch'teu, sans doute, i's'sont r'gardents.'
'Tu n'as pas d'peux que l'Systeme dispathaitra .out. fait?'
'Pas dans notre temps' J'dis 'ch'est à dithe pas dans l'Campagne. Mais en Ville j'n'a pas si seux. Nou pouôrrait vais des changements la d'vant long.'
Après chenna, Moussieu, j'n, mimes à pâsler de plusiers choses, c'menchant par l'travaux dans l'Avenue Victoria et la Merrienne r'mertchi que l'Sénateur Crill criyait que ch'ta une méprinse, et que l'Avenue éthait deu être laissie comme oulle 'tait.
'Vèthe' j'li dis 'et y'en a d'autres d'la même opinion. Nou dit que bétôt la limite de quarante milles à l'heuthe pour les autos s'sa chinquante ou même pus jusqu'au Bel Royâ et que deux entrepreneurs d'entêrrements et trais docteurs voudraient s'établyi la une fais qu'les travaux s'sont finis. I'n'y étha pas de qu'min s'pathé pour les cyclistes.'
'Lé Sénateur Krichéfski n'en voulait pas' ou r'mertchit. 'J'voudrais l'vaie sus une bike mé. Crais-tu que l'Sieur Boudin en éthait yunne tchi pouôrrait li faithe? Yunne bâtie comme un tracteu, p't-être.'
'R'garde, Merrienne' j'li dis, 'I'm'semblye que tu'ès d'une drôle d'humeur à ces sé. Je c'menche à craithe que tu'as bu tchiquechose pûs fort que du thée!'
'Dis-mé chenna ocquo une fais, Ph'lip!' ou dit, 'et tu t'en r'pentithas.'
Et, Moussieu, j'eus l'avis de m'taithe.
11/2/1961
Viyiz étout: