Québec, P.Q.,
Cannada,
Lé 25 dé mai, 1968.
Moussieu l'Rédacteu,
Nou-s-en vait d'toutes les sortes dans la vie si nou vit longtemps assez. Lé vièr diton nouos dit "I' faut vieilli ou janne mouothi!", et quant à mé j'n'ai janmais ieu l'envie d'mouothi janne - j'n'en ai mème autcheune envie à ch't heu qué j'sis pus près d'la huiptantaine qué d'la septantaine! Dgieu mèrci, la vie a 'té bouanne et pliaîsante pour mé, mais i' n'est pon donné à tous dé vivre vièrs, et ch'est ch'la qué l's hommes d'affaithes avaient dans l'idée quand il' înventîdrent l'expression "Étant sain de corps et d'esprit, mais sachant l'incertitude de l'heure de la mort!", pour mettre au c'menchement des testaments!
I' n'est pon donné à tout l'monde, ni n'tout, dé vaie les restes mortels d'eune pèrsonne sept ans et d'mi auprès sa mort. Eh bein, né v'la chein tch'i' m'arrivit eune fais!
Y'a eune quarantaine d'années, dans la prînme dé la vie, et qué quand j'tais, nou peut l'dithe, j'tais iun des directeurs d'un grand chantchi au bord dé la riviéthe du Dêtrait, dans l'Êtat du Michigan, nouot' président 'tait un moussieu d'fanmile distîndgie en Angliétèrre, mais il avait 'té né dans l'Êtat d'New York où'est qu'ses pathents avaient d'la propriêté. Il avait quand-mème passé san janne temps en Angliétèrre et avait 'té à l'êcole dans l'fanmeux collège d'Eton, mais ayant 'té né en Améthique i' s'en vînt à New York finni ses êtudes à l'Univèrsité dé Cornell, et au Collège Naval. I' fut commissionné dans la marinne des Êtats Unis et 'tait offici dans les navithes dé dgèrre dans la dgèrre entre l'Améthique et l'Espangne. Quand la paix fut rêtablyie, i' s'décidit d'rester à tèrre, mais i' n'pouvait pon s'empêchi d'passer san temps parmi les navithes et i' d'vînt en fîn d'compte président d'la compangnie tchi faîsait valer l'chantchi.
I' d'meuthait dans eune belle grand' maîson tch'avait eune superbe biblyiothèque et un salon d'mûsique atout eune orgue tch'éthait fait envie à bein des grandes églyises. Sa danme 'tait hardi pouor la mûsique, et y'avait trais ou quat' pianos dans la maîson autrément qu'l'orgue! I' viageaient hardi, l'moussieu et sa danme et lus deux filles, et il' 'taient houors pour trais mais touos l's êtés, tchiquesfais en Europe, et comme i' s'adonnait qué jé n'tais pon mathié et qué j'tais libre dé d'meuther autcheun bord, ch'tait mé tch'allais d'meuther dans la grand' maîson duthant ches trais mais-là pour en prendre soin et seurvilyi domestiques et sèrvantes.
Un mangnifique moussieu, si janmais y'en a ieu iun! Mais la maladie arrive siez les mêssieux comme siez les pauvres, et quand i' mouothit d'un mauvais ma, sa danme donnit d's ordres à l'entrépranneux tch'i' fallait qué j'fûsse présent à s'n embaumement - tch'est oblyigatouaithe en Améthique et au Cannada.
Comme ou' n'savait pon trop bein ioù l'entèrrer (il' avaient des propriêtés dans l's Êtats d'Arizona et d'Califournie étout), ou' s'décidit dé l'mett' dans un caveau dans un mausolée pas liain d'siez ieux, un caveau tchi n'tait pon souos tèrre - il' en ont tchi sont creûsés dans des muthailles des mausolées comme les bouaînelles dans les muthailles des vielles maîsons, et i' sont grands assez pour y mett' des côffres et chînmenter l's entrées.
Sept ans et d'mi pus tard, la veuve acatit un caveau d'mème dans l'mausolée du fanmeux chînm'tchiéthe dé Forest Lawn Memorial Park en Califournie, où'est qué l's acteurs dé Hollywood èrpôsent, et ou' m'donnit d's ordres dé faithe dêhaler l'côffre, dé l'ouvri pour m'asseûther qué ch'tait l'chein dé s'n homme, et d'm'en aller atout à Los Angeles! Quand j'eus l'côffre ouvert, j'trouvis qué l'moussieu embaumé n'avait pon changi hardi. La ché d'sa fache et d'ses mains avait pûtôt l'air dé parchémîn, et m'fît penser ès momies qu'j'avais veu dans les mûsées d'Londres, dé New York et d'L'Êgypte. Ses habits avaient l'air d'êt' mouaîsis - j'avais oubliyé d'vouos dithe qué nou-s habil'ye les morts ichîn dans lus bouans habits dévant l's encôffrer!
J'l'enm'nis par "train" les 2,000 milles du Dêtrait à Los Angeles. Lé côffre 'tait dans la caboûse, et j'avais san titchet dans ma pouchettes. I' couôtait la mème chose comme pour un passagi vivant. Arrivés à destinnation, j'eûnmes un court sèrvice funèbre et l'côffre fut pliaichi dans l'nouvieau caveau dans la muthaielle dé la chapelle du mausolée à Marie Dressler. D'l'aut' côté d'la chapelle est l'chein à Jean Harlow. Dans chu temps-là, William Powell, sén amouotheux dans san vivant, env'yait eune grand' pannelée d'fraîches violettes touos les matîns pour mettre au pid d'sa tombe!
Mais pour èrvénîn à man moussieu. Sa veuve vînt mett' des flieurs au pid d'san caveau, et pis ou' m'enm'nit dîner à l'Hôtel dé Hollywood. Là, j'tions à tabl'ye auve plusieurs acteurs dé chu temps-là, et auprès eune touannée dans Los Angeles j'm'en r'vînt à Detroit. Quant à la mémouaithe dé man vièr chef, j'peux dithe qué "J'lé vis vivre et j'lé vis mort et j'lé vis sept ans auprès sa mort!"
George d'La Forge
Viyiz étout: