Trenton, Michigan,
U.S.A.
Lé 29 novembre, 1969.
Moussieu l'Rédacteu,
Eune chose tchi m'a pathue drôle ches dreines années en Jèrri est d'vaie les faillis p'tits tas d'vrai à La Pulente, lé long d'La Route des Mielles, et à L'Êta! Nou dithait à les vaie qu'les vraitcheurs ont décidé d'arrêter pour aller dîner quand l'tas est à la maîntchi fait, et pis tch'il ont oublyiyé d'èrvénîn l'finni l'arlévée! Jé n'sai pon si ch'est qu'les tas m'pathaîssaient pus hauts quand j'tais mousse viyant qué j'tais pus p'tit, ou l'contraithe, tch'i' m'pathaîssent pus p'tits viyant qué j'sis pus grand qué quand j'tais mousse! Mais tant pus qu'j'y pense, tant pus i' m'sembl'ye qué les vraitcheurs d'à ch't heu font des faillis p'tits tas d'vrai. Les cheins dé y'a eune septantaine d'années prannaient d'la peine à faithe un bieau haut tas d'vrai tch'en valait deux des cheins d'à ch't heu, et, si ma mémouaithe né m'trompe pon, i' s'vendaient pour un louis l'tas! Jé n'sai pon combein qu'ch'là s'vend d'nouos jours, mais j'crai bein qué comme dans toute aut' chose, lé prix a renchiéthi hardi.
Quand j'tais mousse, il' avaient tréjous eune manniéthe d'attraction pour mé, les tas d'vrai. Les Pulentchièrs, prîncipalement, avaient du goût dans lus travas, et lus tas 'taient bein arrondis, bein rangis et d'la mème hauteu. Y'en avait bein pus qu'à ch't heu viyant qu'y'avait gentiment d'hommes tchi n'faithaient rein d'aut' qué d'vraitchi pour gangni lus vie, et nou viyait des vrégies d'vrai à stchi sus l'hèrbe dans les mielles.
Dans ieune des séthées passées au pid du feu auve Papa dans l'hiver i' m'avait raconté comment qu'eune fliotte dé navithes dé dgèrre, plieins d'soudards - Français ou Espangnos - jé n'mé r'souveins pon trop bein létché des deux, car j'vouos pâle dé y'a pus d'septante ans - avaient ancré dans la Baie d'St. Ouën auve l'intention d'envahi l'Île, mais qu'en viyant des rangies d'tas d'vrai dans Les Mielles il' avaient pensé qué ch'tait des soudards atout lus rouoges câsaques tch'étaient rangis-là à l's attendre, et tch'il' avaient décidé d's'en r'aller sans atterri! Dépis qu'j'avais veu man p'pèe et m'n oncl'ye Dâplheusse dans lus habits d'La Milice Rouoyale, j'avais tréjous admithé les rouoges câsaques, et j'aspithais d'êt' d'âge d'en mett' ieune et êt' soudard, et jé n'pouvais pon vaie un tas d'vrai sans penser à eune rangie d'soudards!
J'm'èrsouveins, étout, qu'la preunmié fais qu'j'êprouvis à feunmer ch'tait drièthe un tas d'vrai à L'Êta qué j'mé muchi à l'faithe. J'n'avais qu'dgiex ans dans l'temps, et man p'tit fréthe Fraînque, tch'était auve mé, n'en avait qu'sept, li. J'avions acaté châtcheun nouot' pipe en pliâtre à la boutique siez Maît' John Le Feuvre à La Fontaine (lé fréthe du défunt Juge Francis Vibert Le Feuvre) pour deux sou. Il' avaient d'longs tuyaux, ches pipes-là, et l's anciens les rompaient à la londgieu voulue, et les pipes nièrchissaient à m'suthe tch'il' 'taient feunmées. J'avions prîns deux brîns dé p'tun dé d'dans l'chipaûdé à Papa (ch'tait du p'tun appelé “Dark Shag” en Angliais), et j'nouos décidînmes dé feunmer nouot' pipée en cachette - et nouos v'la assis drièthe lé tas d'vrai à chèrgi nouos pipes et l's alleunmer. J'feunmes malades comme des tchians touos les deux, et j'tions acouo badauds quand j'èrvînmes à La Forge, mais j'nouos en vântînmes pon! V'la tchi nouos fît pèrdre l'ambition d'feunmer pour eune volée! J'èrquêmenchînmes pus tard, mais y'a longtemps qu'j'avons tchitté à feunmer à ch't heu qu'j'avons pus d'septante ans et bein pus d'avis!
Combein d'fais, qu'j'ai pensé à la peine qué les pouorres chévaux avaient quand les fermièrs y'allaient, au vrai, l'temps passé! I' fallait haler hèrnais et chèrge dans les tchithiéthes, dans des temps sus l'sablion, amont les montées, et pis ramonter l'Mont du Vallet pénibliément! Dans chu temps-là y'avait des rangies d'hèrnais à attendre pour qué l'mèr fûsse dêcouvert, et cht'ait au chein tchi s'sait l'preunmyi à chèrgi. Y'en avait tchitchuns tch'étaient fanmeux à crouaisi les rotchièrs où'est tch'i' y'avait mouoyen d'passer sans tchitchiéthes mais auve la mé à hauteu du haut du banné du hèrnais et d'la tête du j'va, pour lus trouver les preunmièrs, en tête à chèrgi dans la tchitchiéthe! Mais tchi peine pour lé j'va! Ch'est seux qué s'i' pouvaient pâler, les j'vaux, i' r'mêrciéthaient l'Bouan Dgieu châque fais tch'i' vaient un “lorry” pâsser dans la route chèrgi d'vrai!
Mais auve toute nouot' sympathie pour lé j'va, i' n'faut pon oublyiyer qué l'fèrmyi travaillait dû étout. Dans chu temps-là quâsi touos les fermièrs 'taient vraitcheurs. V'la tchi veurt dithe tch'i' travaillaient niet et jour - dans les clios à londgieu d'jour et au vrai la niet, et i' r'vénaient à la maîson dans les p'tites heuthes du matîn, trempés jusqu'à la pé et dépis les pids jusqu'à la tête! Et pis, i' n'restaient pon au liet la maîntchi du préchain matîn viyant tch'il avaient travailli quâsi toute la niet. I' r'étaient d'but à sinne dé jeu - sans mème aver ieu la chance dé dithe bonjour à la bouannefemme - sans pâler d'la catinner!
George d'La Forge
Viyiz étout: