Entouor les mauvais livres
Aut'fais y'avait des gens tchi possédaient chein qu' nou-s-appelait des mauvais livres, des livres d'magique souo-dîthant - lé grand Albèrt et lé p'tit Albèrt. Ch'tait des livres d'chorchell'lie qué d'aut's nommaient étout lé grand-mêlé et lé p'tit-mêlé. Ches vièrs livres sont dév'nus à ch't heu bein rares en Jèrri. Et nou dîthait tch'i' n'fallait pon les liéthe, car nou-s-éthait à les dêliéthe, ou les r'liéthe à l'arbours!
Mais, tchiquefais, nou dîthait même d'un tel et tel tchi pathaissait saver tout, ou d'un autre tchi n'savait rein, en dérision, tch'i' savait l'grand Albèrt par tchoeu. Eune mâsse dé monde, dgia, en avaient eune mortelle peux, dé patheils livres, tchi n'cont'naient véthitabliément qu' du baragouîn en forme d'èrchettes et d'charmes pouor les dgéthîthons d'maux, et cétéra.
Lé chein, don, tch'avait iun d'ches livres 'tait censé pouver faithe autcheune pèrsonne marchi dans san dormi, et d'la faithe aller autchun bord ou à autcheune pliaiche où'est tch'i' li pliaîthait. Et y'avait bein d'aut' niolîn entouor. Ches livres né pouvaient êt' dêtruits. Si nou l's env'yait au feu i' n'sé brûlaient pan; si nou les j'tait à la mé, i' s'èrtrouvaient l'lendemain dans l'côffre au dans l'armouaithe dé où'est tchil' avaient sorti. Ch'tait la même chose étout si nou l's entèrrait. N'y'avait qu'eune seule manniéthe comme tchi qu' nou pouvait enfîn s'en dêbarrasser. Fallait l's entèrrer en même temps et à la mort du chein tchi l's avait, eune fais pouor toutes.
Nou-s-appelait tchiquefais lé grand Albèrt la bibl'ye des chorchièrs. Lé p'tit Albèrt n'était pon considéthé si dangereux, mais y'avait à s'en mêfier quand même.
Eh bein, nou n'les vait pus, ches célèbres livres, et nou n'en pâle qué rarement à ch't heu. Mais cèrtains y craient acouo pouortant, sans saver trop pouortchi. Il' en ont ouï pâler ès vièrs, et ch'est tout.
Si ch'est tch'i' vouos pliaît liéthe eune mâsse d'histouaithes entouor ches "mauvais livres et lus êffets, et d'aut's histouaithes étout, ou pouvez vaie ch'la dans l'fanmeux gros livre par MacCulloch, Bailli d'Dgèrnésy aut'fais, tchi s'appelle "Guernsey Folk Lore".
F
Viyiz étout: