|
J'tai l'dgiès-huit de Juin, mil huit chent quarante-six, Je r'venais d'man travâs et y faisait d'la plyie; Et en touonant la carre de la ruette à Jolin, J'rencontri la fille au vier Tomas Pepin. J'nos entre ergardimes et j'li fît un salut, Oul' allait bouan raide, car la plyie tchiyait m'nu; Et mé tchétais trempé, j'avais hâte dête siez nous, Que je n'prins pon la peine de lî dithe how-de-do. L'Dinmanche enr'venant, en sortant d'la Chapelle, J'lî l'vi man chapé, car j'la trouvais si belle; En lî tendant ma main j'lî dis coumme-en-va, Ou m'dis en souoriant: d'charme merci Messe Bensa. Je marchîmes douchottement et j'nos mîmes à pâlai Sus l'ministre et l'sermon que je v'nîmes d'écoutai; Mais j'voulais lî pâlai d'tchique aut' petite chose, Et la tête me touonait, je n'tais pas sus des roses. J'avais la courte haleine et l'pouor tcheu me battai, Et j'pensi, mon doux, tchèque j'men vais devenai; A la fin j'prins couothage, et en tremblant, j'lis dis: J'vos aime, Miss Pepin, rêponnez j'vos en prie! Ou me r'gardi si fixe que j'en fut tout ému, J'grénottais coumme un rat et j'ni niyais q'bliu; Ou vi bein m'n'embarras, et sans perdre un instant, Ou m'dis: Messe Bensa! j'en pâlelai à maman. J'la condit sièz lyi, mais j'tais pûs mort qu'en vie, Et quand j'vins sièz nous touos nos gens 'tais couochis: J'en fut bein content car tout d'suite j'monti, Et j'menvyi sus man lyièt, je n'tai pas pour dormi. Mais l'Lundi ossé, coumme j'avaîmes accordèt, J'nos entre rencontrîmes dans la rue du Long Bouèt; Et sitôt que j'la vit, je sut qu'tout était bein; Ou m'donni san tcheu, et mé j'li donni l'mein. Et ne v'là coumme j'la trouvi, ma noble Julie; Dans sièz meis j'fûmes mathiès, et i' faisait d'la plyie; Et janmais jusqu'ach'teu j'n'avons ieu un seul mot. J'nen dithai pas d'autre, j'en ai dit déjà trop. J. L. F. |
Viyiz étout: