|
J'men vais vos êcrithe une histoithe Que toutes les filles aimethont à lièthe: Ch'est d'un jeune houmme, et quand je l'vit, Nia qu'mé tchi sai coumme je m'trouvi! Je r'venais d'abreuvai les bêtes, Et j'avais un mio ma à la tête, Je n'lé viais pas appréchi; My good! my good! coumme je m'trouvi! J'n'avais à peine que dgiès-sept ans - Ocquo bein janne pour un galant - I m'dit bon-souer et m'arrêti; Nia qu'mé tchi sai coumme je m'trouvi! I me d'mandi ouèque je d'meuthais, J'lis dis sièz l'bouanhoumme Clem de Faye: I prins mes canes et m'les porti; Je n'peux pon dithe coumme je m'trouvi! Et quand je r'vîmes à la maison, J'lis dis d'entré; - i' n'voulit pon, I'prins ma main et la baisi; Hélas, bouannes gens! coumme je m'trouvi! I' m'dis good-bye, j'te r'verrai d'main, En r'venant d'la Crouès Câtelain; Je l'vit: grand doux! i' m'proposi! Ou n'savais pas coumme je m'trouvi! Je m'iattendais, mais pas si vite, Et j'lis dis oui! pour en être tchitte; I' m'prins par l'co et m'embrachi; Nia qu'mé tchi sai coumme je m'trouvi! Pour sept mais d'temps je fimes l'amour; Hélas! que j'tai des heutheux jours! Mais quand sus l'mathiage i' m'pâlit, Nia qu'mé tchi sai coumme je m'trouvi! J'li dis: Mais nia pas l'temps perdu. Je sommes bein jannes, et pis rêve-tu? Mais quand i' m'dis t'chil 'tai pressi, Nia qu'mé tchi sai coumme je m'trouvi! Et à la fin j'nos fîmes mathié, A la p'tite chapelle de Rozé; Et quand l'service fut tout fini, Nia qu'mé tchi sai coumme je m'trouvi! Je r'vîmes sièz nous pour dêjeunné, Et pis i' fallait s'prépathai: J'nos embertchîmes pour Guernési: Mes p'tits êfans! coumme je m'trouvi! Je primes une chambre sus l'Esplanade, Et coumme j'étais, oui, bein malade, I' fallut toute suite me couochi; J'vos dithai d'main coumme je m'trouvi! JLF |
Viyiz étout: