 L'Hèrmitage dé St. Hélyi
|
Hélyi fut né à Tongres en Belgique, probabliément entre 510 et 520 AD. Il arrivit en Jèrri d'vièrs 535 - 545 AD. I' d'meuthit tchînze ans sus un rotchi et i' r'chut la couronne des martyres d'vièrs 550-560 AD. Ch'fut li tchi apportit la Chrêtchienneté en Jèrri.
Les haches crouaîsies sus l'êtchusson d'la Pâraîsse d'St. Hélyi nos ramémouaithent tch'i' fut assâsinné - la tête copée - par des pithates, et ainchîn d'vînt un martyre.
La légende dé sa vie nos dit qu'i' prînt sa tête dans ses mains et prînt tchiques pas vèrs les pithates tchi l'avaient tué, et les pithates 'taient tellement êffrités tch'i' lus en allîtent et n'èrvîntent pus janmais à pèrsétchuter l's habitants dé l'Île.
Jé cêlébrons la vie du Saint tchi nos donnit la pathole dé Dgieu lé 16 d'Juilet dé châque année auve un pélerinnage tchi c'menche à l'Églyise Pârouaîssiale d'St. Hélyi, au mitan d'la Ville, et tchi va à la grève, par sus l'pont au Châté Lîzabé et jusqu'à l'Hèrmitage tchi fut bâti sus la pliaiche où'est qu'St Hélyi d'meuthait.
I' y'a un creux dans l'rotchi couvèrt par l'Hèrmitage tch'est connu coumme lé Liet à Saint Hélyi. Nou peut aîsiment înmaginner la vie sévèthe du Saint tchi d'meuthait et priait ichîn à san tout seu, exposé ès vents et à la mé duthant tchînze ans.
San corps n'tait pon entèrré ichîn en Jèrri. I' fut transporté (par san discipl'ye ou par un mithacl'ye, s'lon les difféthentes vèrsions d'la légende) à Bréville-sur-Mer en Nouormandie, où'est qu'i'y' a eune statue du saint et eune fontaine dé Saint-Hélyi. L'ieau veint, s'lon la légende, d'la pliaiche où'est qu'lé corps du saint restait duthant lé viage à Beaubec, et y'a des gens tchi veinnent à Bréville à seule fîn d'laver l's ièrs dans l'ieau d'la fontaine pouor lus dgéthi des maux d's ièrs.
Ch'est à Beaubec qu'nou crait qu'lé corps du saint s'trouve ach'teu, mais ch'est ichîn en Jèrri qué Saint Hélyi est l'pus honoré.
Viyiz étout: