Les Pages Jèrriaises

L'Hèrmitage

 

L'Hèrmitage
L'Hèrmitage dé St. Hélyi

 

L'Hèrmitage fut bâti au douzième siècl'ye sus l'rotchi où'est qu'Saint Hélyi avait d'meuthé en Jèrri.

Ch'est eune hardi p'tite chapelle tchi couvre lé creux dans l'rotchi connu souos l'nom du “Liet d'St. Hélyi”.

 


Lé liet d'St. Hélyi

 

Lé bâtisse est seize pids d'haut et quartorze pids d'long. Lé lief est dgiêx pids d'laize mais l'plianchais est seulement chîn pids d'laize viyant l'rotchi tchi fait eune grande partie d'la muthâle du Nord.

Quand l'Châté fut bâti, nou distchutit entouor tch'est qu'i' fallait faithe auve l'Hèrmitage pa'ce qué nou considéthait qu'un ennemîn pouôrrait y êtablyi tchique fortificâtion pouor attatchi l'Châté même. Nou suggéthit même la dêmolition d'la chapelle et du rotchi à seule fîn d'mus protégi l'Châté. Mais nou dêcidit d'y înstâller eune maîson d'garde auve des canons.

Chutte dêfense-là fut abandonnée au dgiêx-huitième siècl'ye. Et l'Hèrmitage fut laîssi ès êléments.

Pouor les touristes tchi v'naient duthant l'dgiêx-neuvième siècl'ye, ch'tait eune ruinne pittoresque à vîsiter.

Au c'menchement du vîngtchieme siècl'ye, l'Douoyen Falle ravigotit l'pèlerinnage pouor la Saint Hélyi, lé seize dé Juilet.

En 1902 l'Hèrmitage fut restaûré et acouo eune fais en 1930, mais duthant l'Otchupâtion l's Allemands tapîtent un creux dans la muthâle du Vouêst. Lé damage fut r'pathé en 1952.

 

Viyiz étout:  

Les Pages Jèrriaises