J'trouvis man saint muchi dans l'angl'ye driéthe eune tabl'ye
Dans la p'tite sacristie d'l'églyise. Moussieu l'tchuthé
Prînt man saint dans ses bras, l'embraichant. Ch'est r'mèrquâbl'ye
Coumme tchi qu'les saints dans lus vie mortelle tortuthés,
Tués, attatchis, pis adouothés, priés, louangis,
Èrmèrciés mille fais, mille fais ramémouaithés,
Ach'teu sont laîssis tout seurs dans la sacristie
Hors la vaie d's ièrs tchuthieurs - et du monde entchi.
Auve sa tête dans les mains, dans les bras du tchuthé,
Man pouôrre saint est r'mué d'l'angl'ye oùest qu'i' tait tant muchi.
Lé saint 'tait b'sant, lé tchuthé halait, j'murmuthais
Des priéthes dé peux qu'lé saint s'sa acouo bigorgi,
Dêcapité, dêchithé. Ses habits en chiques
Et sa fache hôrrifiée rappellent sa vie d'mînséthe
Et d'glouaithe. Sus san dû rotchi, i' d'meuthait y'a tchiques
Siècl'yes. Muchi dans l'angl'ye d'l'églyise, r'est-i' solitaithe!
Geraint Jennings
|
