St. Hélyi
L'Hèrmitage dé St. Hélyi
|
Y'a eune gamme bein connue qu'nou joue parfais dans l's offices et aut's bords à seule fîn dé s'motchi des Belges: pouv'-ous nommer chîn Belges fanmeurs? Les cheins tch'ont ieu d'la diffitchulté à trouver des Belges fanmeurs dév'thaient lus ramémouaither d'St. Hélyi.
Hélyi fut machacré lé seize dé Juilet 555 - s'lon la tradition - ichîn en Jèrri, mais i' c'menchit sa vie dans la ville dé Tongres (ou Tongeren en Fliamand) tch'est au jour d'aniet en Belgique.
Ouaithe qué j'connaîssêmes Hélyi pouor aver apporté la Pathole dé Dgieu en Jèrri, dans la Grand' Tèrre il est connu pustôt comme dgéthisseux - sustout des maux d's ièrs et d'la pé. Y'a des chapelles et des fontaines dgéthisseuses dêdiées à St. Hélyi en Nouormandie par la route, qu'i' pathaît, qu'i' suivit en allant dé Tongres ès côtes du Cotentîn. Mais san pouvé dgéthisseux est connu étout en Brétangne, et nou-s'a r'mèrtchi eune èrcrututhe d'la crianche en d'itelles fontaines dgéthisseuses Brétonnes et Nouormandes d'pis l's années septante du siècl'ye pâssé.
J'n'avons pon d'fontaine dgéthisseuse dé St. Hélyi ichîn en Jèrri, mais l'Hèrmitage vaut tréjous eune vîsite - sustout au mais d'Juilet quand j'avons l'Pèlerinnage. Înmaginnez don comme tchi l'saint soulait prier d'but dans des mathes dg'ieau fraide en Hivé - ch'est bein pus pliaîthant en Êté!
J'souhaitons eune bouonne St. Hélyi ès Villais, ès gens d'Jèrri - et ès Belges, même s'i' n'sont pon fanmeurs!
Geraint Jennings
Viyiz étout: