Bouônjour, bouonnes gens. Né v'chîn la lettre Jèrriaise pouor Dînmanche, lé treize dé Juilet et ch'est Jill Bartholomew tchi vos pâle aniet.
Ma fîngre, tchi difféthence qué chîn mais peuvent faithe!! Quand j'vos pâlis la dreine fais en févri j'tais à commenter sus les conditions météorologiques êpouvantabl'yes qué j'avêmes enduthé pouor bein dés sémaines, et chenna auve des astronomiquement grandes mathées tch'eûtent lé r'êffet d'grands d'gâts par les côtes. En contraste total, Dînmanche pâssé au sé, jé m'trouvais à Sainte-Catherine, à l'agriabliément caud solé, à r'garder la mathée tchi cliapotait sus les rotchièrs, si douochement qué l'ieau n'èrmuait dgéthe du tout. Coumme tchitch'un tch'èrvînt sus l'baté à vaituthes chutte séthée-là, m'dit auprès, lus viage en mé 'tait plus pliat qu'èrcachi siez ieux pus tard, viyant l'êtat de tchiques routes de Jérri! Chennechîn prouve sîmpliément qu'nou n'peut janmais souos-estînmer la dominnâtion de la Méthe Nature pouor du temps.
Ches deux s'maines ont 'té bein affaithées pouor nouos membres d's Êtats - si j'ôse dithe qu'il' ont gângni lus salaithe dreinement ! La s'maine pâssée, j'eûnmes lé d'bat sus l'expéthînment proposé d'la boutiqu'sie du Dînmanche, tchi, coumme eune résidente de Saint-Hélyi, j'm'en rêjouis, a été voté contre pa'ce qué j'avons bésoin d'aver UN jour de trantchilité dans la ville, sans l'pataflias des habituelles vaituthes de commèrce tout alentou à sinnette du jour, suivie d'eune massive arrivée de vaituthes à abouler les travailleurs et les gens à voster étout, auvec les problièmes de stâtionnement. Chennechîn a été suivi par les hardi controvèrsées délibéthâtions entouor l'alibêle dé Plémont, tch'a finalement 'té apporté à tèrme - satisfaisante dé man point d'veue – avec l'acat du site, v'là tchi pèrmettra qu'la natuthe y'en r'gângne par le Nâtional Trust dé Jèrri. Chutte s'maine, ch'est l'tou du d'bat acouo pus cauffé et controvèrsé du mathiage du même sexe. Coumme j'sis à faithe man brouoillon d'chutte lettre mardi au matîn j'sis à siéthe les distchussions sus Twitter et tchiqu's'uns des commentaithes passionnés faits sèrvi, et pouor et contre l'ardgument, v'là tch'est d'la lectuthe întérêssante! Si la décision tchait d'chu bord ou d'l'aut', y'étha tchiques gens bein heûtheurs mais tchiques gens egalement malheûtheurs étout pa'ce qué nou n'peut pon aver du compromîns sus chutte tcheschion, ch'est l'nièr ou l'blianc.
S'ous êcoutez chutte lettre quand ch'est êtrueûlée en l'air dé vrai à vîngt minnutes dé chinq (16:40) l' dîmanche, j'ai r'gret dé n'pouver pon vos r'jouaindre : au lieu jé s'sai à gabather tout l'long du c'mîn d'èrtou du Châté Lizabé à la siette du Pèlerinnage annuel dé Saint Hélyi, tchi, pouor nouos « Clyichards», est lé c'menchement d'eune s'maine dé célébrâtions pouor nouotre saint patron, ch'est en tchi l'réel jour est l'seize de juilet. Ou autrément s'ous êtes à l'écoute sus l'radio de vouotre vaituthe à cachi avaû l'Esplanade, si'en cas qu'ou vèrrez tchiquechose tchi r'sembl'ye à un rat n'yé ou à un honmard radigoté tchi s'sa à crouaîsi la route l'avant à vouos, s'lon l'temps tch'i' f'tha, ché s'sa probabliément mé! Ès pèlerinnages au temps pâssé j'avons 'té sait rôtis sait trempés à la pé l'pus souvent, quouaiqu' y'a deux'trais ans , ch'fûsse lé vent tchi 'tait l'problième, auvec tout l'monde tch'avaient du train à n'êt' pon soûffliés hors du C'mîn du Chaté! I'y avait étout l'année quand les mathées avaient 'té mal caltchulées et j'têmes oblyigis d'attendre à West Park pouor l'èrpitchant pouor la promenade à c'menchi!! V'là tch'êmoûtchit innêvitabliément du badinnage au sujet de la capacité ou autrément de cèrtaines gens présentes dé marchi sus l'ieau ; Malheutheusement les cheins concèrnés n'taient pon prepathés à mettre la théorie à l'êpreuve!
La préchaine sethée pouor les Membres d'l'Assembliée d'Jèrriais s'sa vendrédi lé vingt-chinq d'Juilet Membres et anmîns sont invités à rencontrer driéthe la bangnérêsse ès Tchennevais, St. Brélade à siêx heuthes et d'mie, pouor eune gamme de pétanque, suivi par lé souper. les titchets, au prix dé £10 (dgîex louis) châtchun et pon coumme annonchi d'vant, sont à obténîn de Maureen Le Brun sus 739341 (sept trais neuf trais quat ieune) Enfin, ch'est d'vos ramémouaither que'ch't'année ch'est lé tou dé membres dé l'Assembliée d'Jèrriais à vîsiter nouos fréthes et soeux Dgèrnésiais: chennechin étha lieu tchique temps duthant Août, les dates sont à tèrmier.
Mèrcie bein des fais pouor m'aver êcouté et à bétôt pouor ach'teu.
Viyiz étout: