Trenton,
Michigan,
USA.
Lé 12 dé mai, 1979
Moussieu l'Rédacteu,
"Jé n'sai tchi temps tch'i' fait en Jèrri ches jours?", man fréthe Fraînque mé disait hièr.
"Bouan Dgieu sait," j'lî dis, "car lé temps est si boulevèrsé un mio partout l'monde qué nou n'peut pon s'fier d'ssus pour dgiex minnutes!"
Y'a eune chose tch'est bein cèrtaine: Jé n'm'attends pon d'trouver ichîn dans l'Michigan quand j'arrivethai en Jèrri mardi tchi veint, car la tempéthatuthe a 'té entre huiptante et nénante dégrés (Fahrenheit) chutte sémaine.
J'm'èrsouveins, pourtant, qué j'avions pathel bieau temps à St. Ouën quand j'tais mousse y'a huiptante ans. I' m'sembl'ye acouo vaie les moûques en mâsse lé tout des f'nêtres et d'la grand' porte dans la forge, et qu'les j'vaux qu'man P'pèe et Papa 'taient à féther avaient tréjous la coue en allant en êprouvant à cachi les moûques et bourdons à j'va tchi les vengeaient. V'là tchi n'tait pon c'mode pour man P'pèe quand il 'tait à féther les pids d'driéthe du j'va, car il attrapait tchiquefais la coue du j'va dans la fache, prîncipalement quand oulle 'tait longue. Ché n'tait pon la faute du pouôrre chéva tch'était vengi par les moûques, sans doute, mais v'la tchi n'empêchait pon man P'pèe d'li faithe des teurbleudes su l'co. Papa, tch'était calme et doux d'caractéthe, lî disait: "Né juthe pas d'même, don, man garçon. V'là tchi n'sèrt à rein." Et P'pèe rêponnait: "Ches foutues moûques-là sont assez pour tenter l's Anges des Cieux!"
Tchi bieaux jours, dans chu temps-là! J'avais mains d'dgiex ans, et à ch't âge-là un mousse a eune înmaginnâtion extraordinnaithe et tout est bé l'tou d'li. J'ouai acouo lé bourdonnement des moûques à vèrs et des moûques à myi et des bourdons l'tou des flieurs dans l'gardîn. Dé la f'nêtre dé ma p'tite chambe au haut d'la montée dans la maîson j'pouvais vaie la mé, et j'pensais ès grands navithes à vailes (et j'en viyais tchiques fais) tchi protaient les jannes garçons à La Côtes, et ès naviguants (comme Papa d'vant s'mathier et s'mettre à forgi à tèrre) tchi navidgaient ches bieaux navithes-là partout l'monde. Et j'mé disais qué quand jé s'sais grand j'îthais navidgi étout!
La dgèrre des Boërs 'tait en allant, et y'avait eune gâzette (j'crai qu'oulle 'tait appelée "Police News") tchi montrait des portraits des soudards à la dgèrre, et du camp d'batâle, et tchiquefais des batâles même entre nouos soudards et les Boërs. J'm'èrsouveins d'aver veu l'portrait d'la montangne appelée Spion Kop auve les soudards à ramonter amont et les Boërs sus l'haut à tither sus ieux. Y'a eune pointe dans Les Blianches Banques tchi r'sembliait à la montangne dans chu portrait-là, et ou c'menchi à êt' appelée Spion Kop par les Jèrriais. La viyant d'ma f'nêtre dé chambre étout, i' m'sembliait vaie les soudards ramonter amont atout la baïonnette au but du canon d'lus armes.
Quand v'nait l'dînmanche, j'allais auve Papa sus l'haut du Mont nouos assiéthe endrait l'Hôtel dé l'Êta pour vaie les cârrosses (y'en avait à deux j'vaux) et les grands chars-à-bancs à siex j'vaux lus arrêter à l'hôtel. I' m'sembl'ye acouo vaie la graie r'lîsante des j'vaux auve les âtelles et martîngales en jaune tchuivre, les martîngales sauticottant à m'suthe qué les j'vaux trottaient, et nou-s-éthait dit qué ch'tait d's êtînchelles ou des p'tits êpars dé feu tchi lus sortait d'la tête. Ch'tait bé à vaie!
Dé temps en temps quand i' faîsait hardi caud Papa m'laîssait m'bangner quand la mé 'tait haute. J'mé d's'habilyais dans la grand' tchithiéthe, tch'était bein pavée, lé long et à l'ouest dé la tour, et j'mé bangnais là. Jé n'tais pon en dangi auve les bords dé la tchithiéthe d'amain des deux côtées, et ch'tait d'même qué jé c'menchis à apprendre à nouer. J'n'allais pas bein liain ava la tchithiéthe car Papa m'disait d'n'aller pon dans l'ieau trop profonde, et dans chu temps-là un mousse né pensait pon à d's'obéi. Et pis i' restait près d'mé, et ch'tait rein qué quand la mé 'tait parfaitement calme tch'i' m'laîssait m'bangner.
En pâlant du temps, j'en ai veu dé toutes les sortes dans l'couothant d's années d'pis chu bieau temps-là d'mes p'tits jours en Jèrri. À tèrre, j'ai connu la fraid du Cannada auve sa né et san gliaichon, et j'ai ieu l's ouies g'lées dans eune tempéthatuthe dé quarante dégrés en d'ssous d'zéro Fahrenheit. Et j'ai veu les pays cauds d'l'Afrique, des Indes, dé l'Australie et des pays d'l'Améthique du Sud. J'ai veu l'saccage des "ouragans" et tourbillons d'l'Améthique du Nord tchi tchulbutent bouais et maîsons comme s'il' 'taient faits d'papi mâchi. En mé, j'ai 'té dans les tempêtes dé l'Atlantique dans les grands batchieaux, et dans les "typhons" dé la Mé Chinnouaise et d'l'Océan Indien dans la saîson "mousonne" en faîsant l'tou du monde.
Pour en finni, j'peux dithe qué j'ai veu toutes les sortes dé temps souos l'touannement du solé, et qu'j'ai tréjous prîns l'temps comme i' veint. Quand il est bé, l's anciens disaient: "Ch'est du pus bieau temps d'la vie!" Quand ch'tait l'contraithe, i disaient: "Ch'est du temps du Bouan Dgieu, mais ch'n'est pon d'San miyeu!"
George d'La Forge
Viyiz étout: