Le Ménage ès Feuvres,
St. Ouën
Lé 14 dé juilet, 1979
Moussieu l'Rédacteu,
Comme j'l'ai p't-êt' mentionnée d'vant, quand j'ai tchiques minutes dé laîsi j'aime bein touânner les pages dé iun des Bulletîns d'Quart d'An d'L'Assembliée d'Jèrriais, et tant pus qu' j'y' pense tant pus qu' j'èrgrette la dispathition d'chu fanmeux Bulletîn. Heutheusement qu' les quat' voleunmes sont compliets et îndexés et qu' nou pouorra tréjous les consulter.
Nou n'peut rêellement pon s'înmaginner les trésors d'înformâtion au sujet d'la vie d'nouos anchêtres, vrai vièrs Jèrriais, qué l'Docteu Frank Le Maistre, rédacteu d'ches Bulletîns, a dênichi et récordé d'dans. Par exempl'ye, ou-s-y trouvethez 1,055 vièrs ditons ! Pensez, bouannes gens, pus d'mille ditons înventés par nouos anciens ! Lus r'cord dans les Bulletîns veurt dithe tch'i' vivront longtemps auprès qu' la langue Jèrriaise étha dispathu dans l'Ile et qu' les êtudiants lînguistiques dé bein des pays s'sont à l's admither comme étant preuve dé l'întelligence dé la race Jèrriaise dispathue. Et la raîson qu' ches êtudiants les vèrront dans l'couothant d'lus êtudes longtemps auprès qu' j'éthons dispathu est tch'i' trouvethont les Bulletîns dans les biblyiothèques des unnivèrsités où'est tch'il' ont 'té înstallés par l'îndustrie, l'ênèrgie, innitiative et la correspondance du Sieur Frank Le Maistre, Docteur ès Lettres, vis-à-vis des savants et des ''bibliothécaires'' des unniversités. Et quand j'dis 1,055 vièrs ditons j'dév'thais ajouôter un aut' lot de 862 vièrs ditons du temps, des raisons, récoltes, etc. Un r'cord êrmèrquabl'ye !
En liésant les Bulletîns du c'menchement du preunmyi voleunme jusqu'à la fîn du quatrième, ou trouvethez l'histouaithe dé la vie, des travaux et des crianches des Jèrrais des vièrs temps jusqu'à ch't heu, mais partitchuliéthement la dreine chentaine d'années. Ou vèrrais les noms Jèrriais d'un tas d'choses, des noms tchi n'sont pon connus par les jannes Jèrriais d'à ch't heu. Y'a-t-i' un janne d'au jour d'anniet tchi peu nommer les noms Jèrriais des pommes et d'paithièrs, des ouaîsieaux, des flieurs et pliantes sauvages ?
Et ou-s-y trouvethez les r'chettes pour faithe toutes sortes dé pâtich'chies et d'bouannes choses à mangi. Y'en a des chents. Sav'-ous faithe des mèrvelles ? Ches délicieuses mèrvelles qué nou s'en lique acouo les babinnes au jour d'anniet comme nos anchêtres lé faîsaient y'a tchiques chents ans. Y'a bein des r'chettes dé d'lices înconnues ès jannes Jèrriais d'aniet. Par exempl'ye, d'la gâche à vrai, d'la soupe d'andgulle, d'la gâche à crétons, d'la gâche mêlée, du pâté à solyi, d'la gâche dé pâté levée, des fliottes et des crêpes, des bourdélots, du podîn d'flieu. Mais i' faut qué j'm'arrête – y'en a bein d'autres.
Des d'vinnâles ? Y'en a tout plein – et lus rêponses étout. Et d's arînmées d'nouôrriche et des contes à l'entou d'l'âtre. Et pis les crianches dé nouos vièrs pouôrraient remplyi un p'tit livre. S'ou voulez pâsser eune bouanne séthée à les lièthe ou les trouvethez toutes là. Y'en a tchi son vraiment tchuthieuses. Y'en a ieunne tchi nouos dit qu'les cats ont un vèr au but d'la coue et qu' nou lus cope pour tch'i craîssent, mais i' n'est pon dit s'i' faut coper l'but seulement – ou toute la coue ! Et jé n'sais pon si autchun ancien pouorrait nouos l'dithe au jour d'aniet.
Eune aut' drôle dé crianche 'tait qué quand nou hale tout l'lard dé d'ssus l'os d'palette dé mouton ou d'couochon i' faut faithe un creux l'travers dé peux qu' les chorchièrs né l'change en baté pour crouaîsi l'ieau. Et les naviguants Jèrriais, en mangeant un oeu bouoilli à bord dé lus navithes né l'ouvraient janmais ni d'un but ni d'l'autre, mais sus un côté, comme lé navithe. Et quand nou-s-a mangi un oeu, i' faut pâsser sa tchulyi l'travèrs dé la cruque pour empêchi les chorchièrs dé la faithe sèrvi à s'bateler sus la mé. Et l's anciens criyaient tch'i' n'fallait pon brûler la cruque d'un oeu viyant qu' les poules tchitt'taient à pondre.
Et en pâlant d'chorchièrs un tas d'information au sujet d'chorchièrs et d'enchorchell'lie s'trouve dans les Bulletîns. Et même entouôrre les tchéthauds, tchiquefais appelés d'senchorchéleux, tch'avaient l'pouver dé d'senchorchéler. I' fallait êt' sept fais chorchièrs pour êt' tchéthauds.
Et sav'ous décompter ? Nannîn ? Eh bien, plusieurs Bulletîns vouos dithont comme tchi dêcompter !
Mais ch'n'est pon possibl'ye, dans eune seule lettre comme chette-chîn, dé vouos pâler dé tout chein qu'ou trouvethez entouôrre la vie du temps jadis dans ches précieux Bulletîns. I' prendrait quâsi toute la Gâzette pour lé faithe, car i' sont un vrai ''encyclopédie '' au sujet. S'ou voulez pâsser eune charmante arlévée à liéthe, j'peux vouos en r'quémander la lectuthe.
George d'La Forge
Viyiz étout: