Le Ménage ès Feuvres,
St. Ouën.
Lé 2 d'septembre, 1978.
Moussieu l'Rédacteu,
J'vai qu' la tchestchion d'êtablyi eune neuve couleu pour l'Ile, à rempliaichi la crouaix d'St. Patrice tchi n'a autchun întéthêt symbolique pour Jèrri, est r'venue sus l'tapis dreinement.
Y'en a appathemment tch'ont l'idée d'montrer les trais léopards dans l'mitan d'la crouaix d'St. Patrice, d'aut' dé rempliaichi chutte crouaix-là par la crouaix d'St. George en preunmié lieu, et pis mett' les léopards dans l'mitan.
Quant à mé, j'sis absolûment d'idée qu' nou dév'thait aboli la couleu actuelle et adopter eune couleu tch'éthait pour patron la banniéthe en d'ssus d'la tchaise dé Moussieu l'Bailli dans la Chambre d's Êtats. V'là tchi f'thait eune couleu absolûment distinctive et tchi montréthait, sans autcheune doute, qu' ou r'présente lé fait qué j'sommes eune île Nouormande et des gens d'chutte race-là. J'lé m'ttons en êvidence en montrant les léopards sus l'sceau d'nouot' baillage, nouot' êtchusson, nouos sou, sus un tas d'nouos tîmbres d'poste et sus nouos dotchûments officiels, ch'est en tchi est-ch' qué ch'n'est pon bein à propos d'les montrer sus nouot' couleu à la pliaiche d'en aver ieune tch'est pûtôt l'symbole Irlandais qu' Jèrriais?
Dans eune articl'ye êcrite par Moussieu l'Juge Lucas dans l'Bulletîn d'Quart d'An nunmètho 19 dé L'Assembliée d'Jèrriais à la St. Jean d'mil neu chent chînquante-sept, en pâlant d'la visite attendee à ch't' êpoque-là d'Sa Majesté la Reine, nouot' Duchêsse, d'scendante du Contchérant, i' nouos dit: “Quand, dans la Chambre d's Êtats lé préchain mais, nouot' Bailli - et tchi pus Nouormand qu' li, auve tel nom comme Coutanche - adréche Sa Majesté, pé't'-être que la banniéthe dé Nouormandie au d'ssus d'lus têtes ('La lourde draperie ércarlate que griffent les léopards couleur de soleil') pouôrra êvilyi en ieux dé communs souvenirs.”
Et, n'oubliant pon qué j'sommes Anglo-Nouormands, eune couleu auve les léopards nouos rappréchent acouo pus pres d'l'Angliétèrre, à tchi qu' j'avons tréjous fait preuve dé nouot' fidélité à sa couronne, car “les armes d'Angleterre portent nos léopards d'or sur le fond rouge du vieux Drapeau Scandinave” disait Frédéric Sorel à l'occâsion d'la visite dé Sa Majesté la Reine Elizabeth II en France pas longtemps d'vant. Peut-i' y'aver pus d'raîson pour souôt'nîn l'adoption des trais léopards sus la couleu d'Jèrri?
Y'en a p't-êt' parmi les savants tchi nouos dithont tch'i' y'a eune difféthence d'appathence entre les léopards Nouormands et Angliais, ou tchi y'en a tchi sont montrés “pâssants” ou “rampants”, et tchi'i' y'en a tchi sont picotés et d'aut' tchi n'y sont pon. P't-êt' bein. Mais ch'est p'tit affaithe dé dêcouvri lestchés tch'i' nouos faut pour Jèrri. Y'a assez d'savants par les c'mîns ichîn et en Nouormandie qu' nou peut consulter, et pis y'a tréjous l'Collège Héraldique en fin d'compte pour nouos consil-yi.
J'sai bein, sans doute, tch'i'i y'en a tchi sont d'idée d'garder la couleu actuelle ouaithe qu' ou r'présente pus l'Irlande qué Jèrri. Che s'sait un drôle dé monde si tous 'taient du même avis, mais jé n'peux pon m'înmaginner pourtchi qu' les léopards dé Nouormandie sont sus nouos dotchûments officiels, nouos sou, nouot' sceau d'baillage, nouot' êtchusson et nouos timbres d'poste, et qu' ch'est eune crouaix sŷmbolique d'Irlande tch'orne nouot' couleu! Peut-i' y'aver rein d'pus riditchule?
Quand tchi qu' j'allons trouver tchique Membre d's Êtats tch'a l'couothage d'entanmer l'affaithe? J'avais tréjous espéthé d'vaie l'changement d'vant pâsser l'pas, mais j'c'menche à penser qué j'n'en éthai pon l'bonheu, car lé temps s'avanche à grands pas pour mé.
Y'a eune chose tchi m'console quand j'sis en Jèrri. Ch'est d'vaie lé “Union Jack” dans toute sa glouaithe prèsider sus l'Fort Régent. Ma fîngre, i' m'veint eune aut' pensée: s'i' y'a trop d'objection contre man plian d'adopter les léopards seuls ou sus eune crouaix, nou pouorrait les mett' sus l'mitan du “Union Jack” - le couleu la pus Chrêtchienne au monde dépis qu' oulle est composée des crouaix d'St. George, dé St. André, dé St. David et d'St. Patrice, împosées l's eunes sus l's aut'. Tch'est qu' ou-s-en pensez?
George d'La Forge
Viyiz étout: