Le Ménage ès Feuvres,
St. Ouën.
Lé 10 d'juîn, 1978.
Moussieu l'Rédacteu,
Ch'est r'mèrquabl'ye comme lé temps s'pâsse. Né v'la eune dgiexaine dé jours qué j'sis en Jèrri, et i' m'sembl'ye qué j'y'ai tréjous d'meuthé. J'vouos disais la s'maine pâssée qué j'pouôrrais m'graie sans les changements tch'ont avraûné nouot' belle pétite île mais tch'i' fait bein r'connaître qué l'pâssage du temps l's apportent. Vèthe, ch'est vrai, mais ch'n'est pon aîsi d'aver à l's enduther.
J'allis en ville hièr et j'trouvis la boul'lie piéthe qué janmais. Nou n'est pus en seûtheté d'sa vie à êprouver à crouaîsi les rues. Les motoristes cachent bein trop vite dans ses p'tites rues et il' ont oublié (l'ont-i' janmais seu?) qué l'piêton a priorité d'pâssage n'împorte iou. Et ch'est inutile d'êprouver à marchi à raîsonabliément bouan pas dans les rues. Les visiteurs sont à lus lôvier sus les trottouaithes ou arrêtés à blyîntchi et r'garder l'foustra dans les f'nêtres des boutiques.
Dans les boutiques mêmes i' y'a p'tit d'Jèrriais à vouos sêrvi. En général, ch'est des hardelles tchi vouos r'gardent d'travèrs en espéthant probabliément qu' ou n'allez pon les disteurber en acatant tchiquechose. Où'est tch'est l'temps qué ch'tait des Jèrriais, et hardi d'ieux savaient l'Jèrriais ouaithe tch'il' 'taient villais, tchi vouos faîsaient la beinv'nue siez Vouaîsin et Au Gângne Pétit. I' connaîssaient les clients et savaient quâsi à l'avanche tch'est tch'i' s'en allaient acater.
Et l's apotitchièrs! Il avaient tréjous l'air sympathique et i' vouos donnaient eune boutelle dé méd'cinne pour autcheune maladie. A ch't heu, l'apotitchi est souvent dans un p'tit coin d'eune grand' boutique tchi vend toutes sortes dé marchandises tchi n'ont autchun rapport à la méd'cinne et les boulets d'l'apotiqu'sie. Et quand l'apotitchi a eune boutique à li-même il est dans un appartènement d'tchiquebord en driéthe à prépather d'la poudre ou compter des boulets, et ch'est à eune hardelle tchi n'sait pon la difféthence entre l'ûsage dé l'apathitouaithe quand nou-s-est prîns sus s'n ieau, ou d'la graine dé Batavia pour les vers, tch'i' faut qu' nou donne sén ordre et pis arrêter pour les boulets. Et nou n'vait pus les belles grand' boutelles bossues atout d'l'ieau rouoge ou bliue dédans à r'lithe dans la f'nêtre dé l'apotique'sie comme nou viyait dans l'temps jadis. Et l'charme des p'tites boutiques a dispathu. Il' ont 'té rempliaichies par des grand' babaines dé maîsons cârrées à êtages tchi n'ont autchun goût point d'veue architectuthe.
Ch'est eune bouanne chose qué Madanme Joan Stevens a publié ses fanmeux livres nouos donnant eune histouaithe et portraits des vielles maîsons d'Jèrri. Oulle en a fait un supèrbe chef-d'oeuvre. Et lé livre du Sieur Brett tchi donnes des dêtails et portraits d'maîsons dans la ville pour lé “National Trust for Jersey” est mangnifique étout. Tch'est tchi sait? Un tas d'ches bieaux et historiques bâtisses pouôrraient êt' êventuellement rempliaichis par des bâtîments pus “functional”, comme i'disent en Améthique, et modèrnes, par la folâtréthie d'nouos jours et d'l'av'nîn.
J'veins d'liéthe les gâzettes des mais d'avri et d'mai et j'sis êtonné d'vaie les rapports dé la violence tchi s'pâsse acouo dans l'Ile ches jours, sustout dans la ville où'est qu' des gens sont assonmés par des jannes malfaiteurs. Si janmais y'a ieu bésoin d'faithe sèrvi la baïette pour les peunni, ch'est au jour actuel. Et i' pathaît qu'la louai tchi l'pèrmet s'en va êt' annulée au nom des “Human Rights”. Ch'est r'mèrquabl'ye qué ches souô-disant “Human Rights” sont pûtôt en faveur du malfaiteur, et qué la victinme est souvent oubliée.
Mais j'vai quand-même qu'à la fîn des fîns il a 'té décidé dé faithe les pathents payi pour les d'gâts dé lus êfants attrapés dans l'vandalisme. Y'a longtemps qu' j'ai mentionné dans mes lettres qué j'crai qu' ch'est la vraie mannièthe d'y porter r'miède. Quand v'la tchi touche la pouchette du pathent i' s'en va au mains êprouver à contrôller san garçon.
A m'n idée, ch'est l'manque dé disciplinne dans la vie “conjugale” et même dans la vie ordinnaithe tch'est si visibl'ye ches jours tch'est la cause dé hardi du ma tchi m'niche lé bonheu et la jouaie d'vivre d'à ch't heu. Il est grand temps d'èrquémenchi à adopter les prîncipes dé la vie paîsibl'ye dé nouos anchêtres tchi n'avaient pon d'peux d'avouer la crainte du Bouan Dgieu, et tchi gângnaient lus vie à la sueu d'lus fronts à la pliaiche dé vouler vivre sus la pâraisse, et tch'apprannaient à lus mousses à travailli en sortant d'l'êcole à la pliaiche dé pièrcheûser et d'aller à l'êcole la maîntchi d'lus vie et d'lus fier sus des “B.A's” pour faithe lus c'mîn dans la vie.
George d'La Forge
Viyiz étout: