Acouo eune fais, la fête du film du Brancage r'est par les c'mîns à mouontrer des films dans des carres et des creux hors du c'meun. Véthe, ouaithe qu'l'Odéon n'sait d'aut' un lieu d'rencontre pouor l's entchéthinnés du cinnéma, y'étha d'la mouontréthie d'films à l'Opétha (tchi soulait êt' un cinnéma), au Collège Victoria, au Vièr Châté, à la Salle Pârouaîssiale dé Saint Hélyi, ès tonnelles qué j'appelle acouo, mé, l'Hôpita Souôtèrrain, dans la Vielle Pétite Cour, à la Mênag'gie et dans d'aut's pliaiches. Sans doute, ch'est la technologie avanchie d'achteu des projecteurs tch'aîgue la présentâtion d'grands films et p'tits vidgos dans des difféthentes salles, des tonnelles et des châtchieaux.
Coumme tchi qu'les cinnémas ont changi d'pis les grandes salles enfuntchies qué j'connaissais quand j'tais p'tit! Mais j'n'y vais pon bein souvent. Pouortchi? Assa, ieune des raîsons, ch'est la couôteunme d'aver l'son des films si haut qu'l'êtourdissaison vous prend et qu'nou-s'en trembl'ye quâsîment. Épis nou-s'est accouôteunmer d'aver eune téléc'mande siez-sé pouor pouver contrôler l'son d'la télévision et des DVDs. Mais s'i' y'avait eune téléc'mande pouor toute l'audienche dans un cinnéma, tchi bastaude qué nou-s'y'éthait, don!
Les p'tits vidgos en Jèrriais grées par la fête du film du Brancage ont 'té bein atchilyis. I' sont ofûche les pus grandes productions cinnématographiques en Jèrriais pouor achteu, mais ch'est à espéther qu'la fête s'en va êtibotchi d'l'întéthêt dans l'cinnéma et qu'j'éthons des films en Jèrriais pouor des fêtes à l'av'nîn. Mais tchi films en Jèrriais qu'nou dévthait aver? Au run d'"Casablanca", nou pouôrrait înmaginner "Les Blianches Banques"; au run d'"Casino Rouoyale" - "Eune Séthée d'Bîngo à Saint Martîn"; et pouor l'hôrreu, au run dé "The Hills Have Eyes", j'éthêmes "Les Côtis ont d's Ièrs".
Mais chein qué j'voudrais vaie l'pus, ché s'sait "Indiana Jones et la Vîsite du Brancage".
Geraint Jennings
Viyiz étout: