La rêunion mensuelle eut lieu vendrédi, l'25 dé novembre, dans la Salle d'Agritchultuthe, St. Hélyi, et eune soixantaine de membres lus y rêunitent.
Lé rapport dé la dreine rêunion fut liu et accepté et chinq nouvieaux membres fudrent êlus.
Comme divèrtiss'ment pour la séthée, j'avions l'Sieur A. G. Averty à nos montrer ses magnifiques portraits en couleurs. Preunmiéth'ment j'vîmes les siens prints en vacances dans l'sud d'l'Anglyéterre: y'a d'belles grèves et d'bieau paysage là dans l'sud, et ch'tait bein amusant d'vaie touos l's animaux dans la ménag'gie à Bristo'. Lé préchain film, des portraits dé pêqu'sie et des paissons à l'entou d'l'Ile, 'tait bein întéraissant, Ch'tait tchuthieux d'vaie l's ormèrs bouogi parmi les rotchèrs, mais chein qui faisait envie ch'tait d'vale l's ormèrs bein roussis dans la castrolle, et auprès d'les vaie dréchis dans une assiette auprès aver 'té bein mittonés dans l'fou. La pêqu'sie dé lieu, manchots, des pihagnes, des chuchettes (bobbes), et l'bieau lanchon, en effet l'film en entchi, 'tait divèrsément bouan. Y'avait acouo du temps d'êpaigne et j'vimes dé magnifiques veues d'Jèrri - comme la Corbièthe avec la mé bein calme à l'entou, et auprès avec la mé "comme les monts"
Viyiz étout: