La rêunion mensuelle eut lieu vendrédi, l'29 dé Novembre, dans la Salle Pârouaîssiale dé St. Pièrre, et dans les 150 membres lus y rêunîtent.
Les affaithes c'menchîtent par lé rapport dé la rêunion du mais d'octobre et trais nouvieaux membres fûtent êlus.
Lé restant d'la séthée 'tait des filmes qué l'Chentnyi G. R. Le Masurier avait prîns à la grand' tchéthue et au Fort qué Mde. Eileen Le Sueur nos montrit.
Preunmiéthement la touônn'nie à L'Abri siez l'Chent'nyi W. H. de la Mare nou vit les siex j'vaux sorti dé l'êtabl'ye touos prêts pour lus jour dé travas. Eune fais au clios - les lier à la tchéthue. Y'avait ieu du travas à êtchuther les atelages et ch'tait un pliaîsi dé les vaie èrlîser au solé. Les j'vaux pathaîssaient aller si bein ensembl'ye lé tou du clios. À la maison pour un bouan r'pas qu'avait té prépathé par Mde. de la Mare. Dé r'tou au clios, et pus tard les danmes apportîtent la bouochie; des beurrées, d'la gâche dé pâte et du café. À la fîn dé la journée nou viyait les j'vaux bein lâssé faithe lus c'mîn pour la maison à la tchête d'la niet, et un p'tit lérmîn pour les fèrmièrs qu'avaient fait un si bouan jour!
Lé filme du Fort nos fut montre auprès. Nou c'menchit par l'entrée du Fort, la pliaiche dé parade, les apartéments ès soudards, les belles grand fortes muthâles en granit et la porte en fé - souo-disant la seule - et sus l'tout haut la belle veue dé la ville toute êtendue. Un filme tchi dans les temps à v'nîn quand lé dêveloppement du Fort s'sa fini nous apportétha des mémouaithes du vièr Fort.
Lé Président nos montrit des portraits prîns en Dgèrnésy sus l'excursion à Southampton et Beaulieu et d'la touonn'nie.
Lé Sieur Philip Ahier întérêssit les membres auvec des portraits d'la Turtchie, dé Gibraltar et Malte.
1968
Viyiz étout: