|
Membres du Comité des Havres et Chaussées J'vos l'dit, mes bouannes gens, sautez d'jouée, Car à la fin né v'la-t-i pas Qué tchic personnes dans nos Etats, Qui n'ont pas amor de vos louangi Tchittent tout d'un coup à crititchi, Et s'mettent en train D'tapper des mains; Ils apllaudissent dès qu'ou pâlez Et dès qui savent chein qu'ou voulez I's'dêpêchent vite de voter pour! - Ch'tait bein difféthent y'a tchic jours. Quand i' pensaient à vot' travas Y'a deux-treis s'maines, i' n'pouvaient pas Trouver pour condamner vos d'fauts Un nombre suffisant d'laids mots Ou faisiez chunne chin, ou faisiez chonna... I' trouvaient tréjous moyen d'chanté ma. Mais né v'la qu'achteu nous les vé Tchitter lus pliaintes et pis stèrter Dé VOT côté, pour VOS idées A faithe un tas Dé grands Hourrahs! Ma fingre ch'n'est pas à y craithe Dévant ou n'faîsiètes que minzèthe Du mains, ch'tait chein qui s'disait Et chein de tchi chatchun s'pliaignait, Achteu né v'la qu'ch'est tout l'contraithe I'n'critiquent pus toutes vos affaithes, Mais après vos aver biaumés Et vos aver presque insultés Après qu'ou z'avez 'té pointés au dé Et qu'châtchun ait voulu vos r'présenter Comme trouvant vot' pus grand pliaisi A faithe la ruine de not' Jerri, Taxant par FUN toutes les puorres gens Ov vos droits d'havre... "En 'taiche un plian??" Mais n'voulant pas permettre (Car ou z'aviez l'dé sus la lettre) Aux puorres malheutheux commerçants Dé faithe le HAUL qui voulaient tant. Car ils y t'naient à lus CHUCRIN Mais l'comité 'tait trop malin Pourtchi don êque qu'i n'pouvait pas Frumer ses yers au p'tit travas Qui s'prépathait Et promettait Si bein pour yeux, puorres commerçants, Pourtchi don trébutchi lus plians D'une si cruelle manièthe Et lus faithe tant d'minzèthe? - Ch'là n'est qu'un bein p'tit mio D'chein qui s'disait sus l'co Du malencontreux Comité Et d'châtchun qu'en appartentait. Chen' n'tait pas tout! hélas nan d'ja Yen avait d'aut' sus chu style là Y avait les stores sus la cauchie... Y'en r'a yeu là ètou du d'vis - Tchi laie pictuthe Que chutte structuthe. A tchesque chonna servait? Tchestque chonna rapportait Au Trésorier d's'Etats? Pour rempl'yi ses p'tis sacs Qu'étaient quasi tuos vieddes Fallait trouver un r'miedde Pustôt qu'd'aller bâti Des stores à rein n'servi. - Et quand même qui rapportéthaient Six du chent d'intéthêt... Fallait... Fallait... Fallait pas les bâti!!!" Ch'tait souvent là l'dern'yi D'lus ard'ghuments REMPL'YIS d'bouan sens. Et pis l'fain d'France ètou Qu'était admins partout Vèthe jusqu'à D'ghernési N'voulait pas l'forbanni, Mais ils avaient rouvert lus ports Pour le fuorrage qui v'nait dé t'hors. Mais en Jerri not Comité Dé les rouvri tréjous r'fusait. Et pis ches jours tchest qu'chest qu'nou dit: "L'Comité a sauvé Jerri! Et même dans l'z'Etats tchèsque nou vé L'Juge qui s'unit au Député Et les deux qui veinnent applaudi Chein qu'ou z'avez fait pour Jerri!" Les gazettes Angliaiches mêmes qu'approuvent de vot' travas Et qui publient d's'articl'yes aussi longs comme le bras Rempl'yis d'êloges pour vous!! Tchi changement pour tuos nous, J'né l'comprends pas trop bein Mais j'dis qu'i n'ya pas d'soin Qu'ou zéyis les êloges qu'ou z'avez yeu d'donnés Car j'sé bein pour dé mé qu'ou l'z'avez méthitées. Elie |
Viyiz étout: