Chier Mousieu, - Jé vai qu'la chestion sus l'tapis en Jêrri à ch'teu, est une cauchie ouès qu'nou pouorrai tréjous d'z'emberqui à pié sé.
Y pâlent d'en faire yunne à Niermont: bel et bouan; mais s'ils en font yunne à Niermont, y vos faudra aussi bain un qu'min d'fé dé la en ville, car sans qu'min d'fé y feraient aussi bain, si pon p't'être mus, d'la piqui au Boilié dans la Baie d'St.-Brélade. Mais, comme jé dit, si y'avait un qu'min d'fé, y'n'trouveraient jamais milleure pièche. Chez bain seux qu'ou dévraîtes en avait yunne de quique sorte, car je peux vos dire qu'j'en connais hardi ichin qu'aiment mus allé en Guernézi que Jerri, pour la simple raison qu'là y d'zemberquent confortablement, et qu'en Jêrri, le pus et l'mus, y sont obligis dé d'scendre dans la vâze.
La dernière fais qu'jalli en jêrri, j'avais prins mes précautions pour qu'la mé fusse dans la cauchie, mais je fus oquo basqui, car jé fûmes embêtés deux ou trais heures dans la biâze, dans la Baie de St.-Ouen; et quand j'arrivîmes, fallait, comme de quôtume, d'scendre dans les batiaux, et pis après sauté dans l'pité.
Avous jamais 'té vais lé "Packet" arrivé à mé basse? Si on n'y'avez pon té, allez-y quique bouan jour; y'à bouan "fun" dans des temps, principal'ment quand quique pouore malheureux de "cockney" (comme y pié est Jêrriais de les termer), rigui en gants et en p'tites bottes de "patent leather," en sautant dé d'dans le batté, perd s'n'équilibre, et s'en va la tête l'avant à quatre pattes, parmi la vâze et les galots.
Jêrriais! y vos faut une cauchie, et comme yun a dit:
"If 'twere done at all,
"'Twere well done
"If 'twere done quickly."
Verre dia, mes bouannes gens, tant pus vite tant mus.
Quant au qu'min d'fé et les "Water Works," nou n'en oué pon pus pâlé, et je pense bain qué "with them it's all up a gum-tree."
Eh bain, j'pense que n'en v'là une bouanne bédache; chez pourqui pour le présent, criyis-mé, chier Mousieu, avec salutations respectueuses, votre très humble serviteu,
"Londronnais."
Londres, chu 4 Juillet 1866.
Viyiz étout: