J'n'avais pon 'tè ergarder nos membres des Etats travaill'yi dépis bein longtemps car lus distchussions ne m'intéressent généralement pas fort.
Ch'nest que d'temps en temps qu'i' se d'mentent de faithe tchic chose qui nos touche de près et nou n's'en trouve généralement pon fort mus que d'vant, une fais qu'ils en ont fini.
Je n'dit pas chounna pour faithe bisqui les messieux qui s'assièvent sus les rouoges sièges dans la belle salle y'où qu'nou-z'arrive par une entrèe qu'est généralement plienne de poncièrs et qui vos condit à une longue montée êcliaithie pas deux f'nêtres ponceleuses, car les siens que j'counnais n'sont pas d'mauvais garçons et nou-z'est tréjous bein r'chus siez yeux. Tout d'même, autant vaut l'dithe que l'penser: nou n'se trouve pon souvent fort mus des louais et des distchussions dans les Etats.
Quand une assembliée d'paraisse se décide de faithe êlaisi une route, la route se trouve êlaisie; quand ou décide qui faudra s'graie avec un rât de vingt-huit sous, ch'est à vingt-huit sous qu'il est. Mais quand les Etats décident de rembourser partie des frais à une paraisse qu'à fait des changements à une grand'route, nou' peut attendre! J'ai counnu assez d'cas que j'pourrais citer mais ch'n'est vraiment pas la peine. Et quand nou nos dit à la fin d'une session que la mathèe d'la taxation est seuthe de baissi ôprès l'annèe, faut pustôt s'attendre à la vaie bien pus haut que l'plien d'Mars ordinaithe!
Y'avait un temps que l's'Etats encouothageaient les fermiers en lus dounnant des prix pour les boeus: qu'ils encouothageaient les bouans soudards en votant une quarantaine de louis à la Rifle Association; qu'ils encouothageaient les mousses à apprendre le français en lus offrant de bieaux prix.
Mais ach'teu? ils ont à peu près ègliammi le vièr Coumity d'Agritchultuthe, qui n'est pus que coumme une sorte d'branche du Coumity Technique et chu Coumity-là dêpense pus d'sous, nou m'a dit, à apprendre à des jannes filles à faithe des êtuivèes et des sauces et à laver des vaissieaux que l'vièr Coumity n'en avait pour faithe du bein es fermiers! Ils ont négl'yigi, ou pustôt erfusè, ne v'la plusieurs annèes, de souotnin les gas qui faisaient d'lus mus à Crabbé et à Gouorey, - et ach'teu' nou n'sait pus coumment s'y prendre pour erchasser les Allemands dans lus propres racoins! Ils ont prins un nouvieau système - chèst l'Bailli qui l'a dit, d'après la gazette - pour enseigni l'français et ch't'annèe, i' n'y'avait que quatre livres à offrir pour prix entre les deux ou trais mille avièrs qui vont ès êcoles des Etats, avec le rêsultat que les pouorres mousses n'ont pas seulement le tchoeu de cherchi à ouvri lus livres à l'êcole!
J'vos dit tout chounna en passant; i' servitha à vos montrer que quand nou pâles des Etats et que nou veint à les examiner de près, i' faut s'attendre à trouver du d's'appointement.
Il en a 'tè d'même, ou l'savez tous aussi bein coumme mai, de nos pouorres dépôts à vrais. Là y'où qui y'avait des mielles au temps des vièrs, nou-z'a fait des routes et ach'teuthe ch'est avec les mille peines que nou peu trouver le moyen de tumb'ther deux-trais pouore êchouées d'vraic ou d'plize. Et tch'est qu'en est l'rêsultat? Qu'i' faut acater des guanos à des prix fos et empoêsonner ses terres ov des nitrates! J'avions enviè une pétition pour aver des dépôts ichin et là à seule fin d'n'être pon tréjous obl'yigis d'êtrav'ler nos charges le long des routes, au péthi du monde: J'avions bieau. J'ai entendu dithe à un houmme qu'est accouosinè à yun des commis à Moussieu l'Greffi que la pétition est mouaisie. Mais j'n'en soummes pas pus d'l'avant!
S'i' fallait vos dithe tout, j'n'en finithais pas. Allons nos assiéthe dans la gal'lie et vaie coumment que l'affaithe se passe en d'sous d'nous.
Il est l'heuthe. Mais la salle est viedde! I' n'y'a qu'un houmme ov un uniforme à jaunes boutons qu'est à r'garder si, par chance, y'éthait occouo des mios d'papi à traîner sus l'plianchais, à vaie si le gaz est bein et si l'appartement est cauffè à point. Bétôt, par en d'sous des gros ridjeaux, ne v'la un moussieu qui montre san nez, mais coumme i' n'vait personne, i' s'en r'va. Il en veint deux autres par une porte de côté, un gros et un maigre. I' sont à s'entre-déviser en bas et à s'entre montrer des paiers. I' m'ont l'air d'appartenir de tchic Coumity et d'être à prépather chein qui s'en vont dithe bétôt pour faithe lus bord bouan, coumme nou dit, car quand y'un châque la tête, l'autre le fait ètou, et quand y'un hauche les êpaules, l'autre en fait autant. Il en veint un traîsième et i' s'mettent à lis pâler, coumme pour lis faithe comprendre tchic-chose, car le nouvieau v'nu les êcoute, comme un homme qu'est à "je n'sai" et finit par lus faithe digne que "vaithe." Deux autres messieux entrent, ch'est not' Connêtable et un Député d'la ville. I' s'en vont châtchun à lus plièche, mais les trais autes n'êprouvent pon à lus expl'ytchi chein qu'ils 'taient à dithe. Au contraithe, i'r'mettent les papiers dans lus pautes et s'en vant s'assiéthe.
Deux Juges et quatre Recteurs arrivent patte à coue, mais les Juges n'ont pas les belles robes qui mettent en Cour, ni les Recteurs lus habits d'égl'yise. Nou m'a dit qu'en Djernesey, i' n'vont jamais dans les Etats sans lus robes et même lus bounnets. Ichîn, faut s'contenter d'les vaies habilyis comme des gens ordinaithes!
Ne f'chin Moussieu l'Bailli. Il a une nèthe robe! Eche que sa rouoge es'sait, par chance, au lavage? Tous les siens qui sont là lis font un p'tit salut et i' les r'garde en ritounnant, en s'assiévant dans sa grand' tchaithe. Moussieu l'Greffi et un autre moussieu s'assièvent à une tabl'ye couverte de livres. Ils ont, touos les deux, des brachies d'livres et d'papièrs.
Les uns et l'autres entrent achteu' en patrufiant. Un Recteur ouvre une petite valise, halle une gazette, l'êtale en d'vant d'li, et s'met à la liéthe; un autre se renvèrque à sa plièche et frume les yièrs coumme s'il v'nait d'passer toute la nièt à travaill'yi pour avair du temps d'êpeigne pour s'otchuper d'autres choses que d's'en églyise et d'san chimtchèthe.
Un Juge s'assièd l'dos au radiateur qui cauffe l'appartement et que les autres passent devant li, lis pilent sus les pi'ds, lis faichent des extchuses ou pas, i' ne r'cède sa plièche à personne; je crai qu'il est frilieux.
Moussieu l'Bailli dit deux-trais mots que je n'comprends pas trop, tappe sus sa p'tite tabl'ye ov le bu' d'un crayon, et Moussieu l'Greffi s'met à lièthe sus un mio d'papi les noms de touos les messieux: "Un' tà, écuier; un tè, écuier; un tè, écuier;... Moussieu l'Recteu' de chonnechin; Moussieu l'Recteur d'chonna;... Moussieu l'Counnêtabl'ye dé... Moussieu l'Député de...!! En d'visant, i' r'garde d'un bord et d'l'autre et mèrque bas sus san papi. Les uns disent "présent," les autres font un signe de tête sans tchitter à liéthe ou à prôner entre haut et bas. D'autres ne disent rein car i' n'sont pas là!
Tout l'monde se lève; un ministre se met à liéthe la priéthe. Les uns l'écoutent ov lus tête baîssie, les autres en r'gardant les siens qui sont dans la gal'lie.
La priéthe finie, i'lus rassièvent tous et moussieu l'Greffi se r'met à crier les noms des siens qui n'avaient pas rêponnu d'abord. Pour certains, nou dit: "Absent de l'île," pour d'autres: "malade." Dans chu cas ichin, faut l'ver la main et prendre serment que Tel ou Tel est "indisposé" et n'peut pas assister ès Estats sans endommagi sa santé. Y'en a une tappèe que Moussieu l'Greffi dêcliaithe "En Défaut," mais coumme pour lis faithe ma' il en entre plusieurs presque aussi vite qu'il a mentionnè lus nom et d'mandent que ches "défauts" là es'saient erlevés. Personne ne dounne d'extchuse pour tchi qu'il est v'nu si tard et bétôt Moussieu l'Bailli dit que "l'Assemblièe est en nombre, messieux, les Etats sont constitués."
Et d'même i' c'menchent le travas, à peu près vingt-chinq minutes en r'tard!
Pour vos dithe tout chein que nou ouait là d'dans, je n'pouorrais pon, pour le moment. Une autre bordèe, p't'être, j'êprouv'thai, ov un crayon, à prendre deux-trais notes et à en êcrithe un p'tit bu.
Chein qui m'frappe achteu' ch'est la plièrcheusetè des difféthent membres. Quand ils ont de tchi long ou difficile à liéthe, i' d'mandent tout d'un coup à Moussieu l'Greffi de l'entreprendre.
J'pense bein que Moussieu l'Greffi n'aime pon à lus r'fuser (bieau qu'i m'sembl'ye qu'nou-z'abuse un mio d'li en l'faisant travaill'yi pour les siens qui sont prins d'faingnantise) mais par la maniéthe qui lièt, nou vait bein qu'il êprouve à en être fini au pus vite et j'vos rêponds qu'il y va rond'ment, si rond'ment que, parfais, nou l'vait choppé dans l'mitan d'une ligne et nou l'entend d'mander ès siens qui sont aupi d'li (en angliais). "Tch'est qu'est ch'la?"
Et quand i' s'arrête de même, nou peut vaie des messieux qui s'dréchent, et qui d'mandent ètou à lus vaisins de tch'est qu'i' s'agissait, tandis que d'autres sont si bein attrapés au mitan d'une conversation que nou les ouait laissi couorre une patholle ou deux, que nou n'éthait pon oui si moussieu l'Greffi avait continuè sa bréviaithe tout l'temps.
Quant au Recteu' à gazette, i' continue à liéthe sans s'dêrangi.
Elie
La Nouvelle Chronique de Jersey 3/3/1915
Viyiz étout: