|
Êcris-nous un poème, mais dé l'actualité... - J'voulais tréjous qu'man pays ait 'té heutheux. Auve vous, l'êté mé dêpassa dans l'gardîn, Et tchiqu'un c'menchit à chanter dans eune maîson vaîsinne. Des trains vont à la campangne, înmage de tous les jours, Les bliancs nouages sont les salutâtions des locomotives. A l'êcole l's êfants êcrivent dans lus livres à copier Qué l'pilote est à siéthe l'alouette vèrs l'solé, I'ouaient la conte du nier j'va, Quandi qu'les înginnieux êmoûquent la campangne Châque matîn auve l'êlectricité, Des s'gondes brillantes des r'sources tchi coulent, Les mèthes s'promènent douochement dans l'parc auve lus cârrosses J'pense â un portrait d'Ales', ès êtailes, À la mé lointaine, ès montangnes, ès annees couothageuses, Au ciel ouvèrt pour les fîsés... Tu, l'av'nîn, s'sa bé dans l'peupl'ye, Pour té, j'êprouv'thai des vèrsets d'l'actualité. Je sis entchéthaûdé par la forme des violons, par la rôsée, par l'cèrcl'ye, J'voulons èrtrouver partout un fréthe, quand j'rencontrons un aut', Comme la leunmiethe s'change, très près d'man tchoeu L'vent additionne les fielles des trembl'yes, des bouôlias, La niet est illeunminnée par châtch'eune des înnombrabl'yes êtailes, Aniet, les millions pensent à l'av'nîn, I' pensent qu'les machinnes ont c'menchi à marchi, Qu'des prômesses d's amouotheux ont vêthitabl'yement êpanni! Apèrchéver, dé l'actualité, l'av'nîn. Ô ma vie, dé tous tes jours nou-s-êcrit chaque vèrset, Tu'es un pits profond, tu'es l'pus haut d's êtailes.
(traduit d'l'originna dé F. Bronislav par Geraint Jennings)
|
Viyiz étout: