Moussieu l'Editeu,
La bouonnefemme est mûs sûs en sens, mais oulle a ocquo la vilaine habitude de m'pôsé des tchéstchons à toutes les heuthes du jour, et l'pièthe en est que si j'fais la mine d'n'avé pas entendue je n'gânge rain, car ou s'mârrie et s'lève de sa tchaise pour me pliantchi une paffe.
Bein seux oulle a voulu savé tchèsque j'ai veu ès Shows, et quand j'y'ai dit tchèsque a gângi les prix ou n'est pas ocquo satisfaite.
Asêsé par exemplye, ou m'a d'mandé ouèsque j'avais veu la miyeu vaque, et j'y'ai dit que j'criyais que ch'tait à Saint-Martin. Y faut les vais ensemblyes, j'ai ajouôté, mais je s'sait bein surprint si y'a autchune chose en Ville pour battre la jeune vaque au Sieur Richardson du Clios Fallu aut'fais. Y avait d'raides bouonnes bêtes à la Trin'té étout, et y'en avait d'autres à Saint-Martin, mais chéttechin est tchiquechose de spécial.
Les Richardson's ont tréjous yeu d'bouonnes bêtes, ou m'a dit. Ch'est ocquo d'mes couôsins.
Tes couôsins... et comment chonna?
Mais tu dév'thais savé. Ch'est des d'scendants du bouonnehomme Jôsué l'Gros, tch'avait tait sécretaithe de la Sociêté et ma grand'mèthe du bord de san pèthe 'tait une Le Gros. Bein seux qu'ch'est mes couôsins, et si j'vais au Show d'l'Ile, j'îthai châtchi d'main ôv yeux. Mais ach'teu, Ph'lip, comment qu'tout va ichin à Saint-Ou? J'n'ai ouï rain pour dithe depis deus-trais jours, à cause de chu fichu crabaco tchi m'a gardée au liet. Sont-y tous bouons amins d'pîs chutte réunion-là? Y'a-t'y pon une autre Assembliée la s'maine tchi veint?
Oui, j'y'ai dit, mais je n'crais pas qu'y'étha du brit, car ch'n'est qu'pour distchuté l'affaithe du Sieur Hâcou et ses huit louis la s'maine. Mais bein vite après y'étha une autre Assembliée pour pâssé les comptes du Connêtablye et taxé l'Rât. Quand veindra l'sé y n'faudra s'attendre que tout pâss'sa paisiblyement.
Crais-tu, oulle a d'mandé, que l'Sénateur Le Mérquand s'sa là?
Bein seux qu'oui, et san pèthe étout, j'y'ai dit, si n'lûs arrive pas tchique accident dans l'entretemps.
Et l'Jack Syvret?
Même chose, et sans autchune doute il étha des r'mérques à pâssé. Mais j'ai dans l'idée tch'il étha à être un mio pûs r'gardant à chein tch'y dit que l'autre sé. Ch'est accordant dans tch'il humeur tch'y s'trouve, car y peut être trantchille comme un agnai quand y veur.
Vèthe, sans doute; touos l's'hommes sont d'même. J'en connais yun d'chutte sorte-là ichin au Portinfé. Mais tout chein j'éspèthe, ch'est qu'personne ne tâch'cha d'faithe d'la minsèthe au Connêtablye après tout ch'qu'il a fait pour la pâraisse.
Et mé étout, mais y n'faut pas s'y fié trop, car j'avons d'bein drôles de balloques à Saint-Ou chais jours.
Tu peux l'dithe. Entre nous, Ph'lip, est-che vrai que l'p'tit George Baudains voudrait être Député? Ch'tait la Louisa tch'y m'dîsait chonna ch't'arlevée quand oulle est v'nue me d'mandé ma r'chétte pour du nier beurre.
Oulle éthait fait mûs de s'taithe, j'y'ai dit, mais ou tcheint d'sa miéthe, la pouôre hardélle, et ch'n'est p't'être pas d'sa faute qu'oulle a la langue si longue. Quant au George Baudains, ch'est seux que comme organiste d'la chapelle y ramâss'sait une tappée d'vouais parmi les femmes.
La Merrienne m'a r'gardé en fache pour une bouonne demié-minute, épis. Oh, tu crais chonna? ou s'est faite, eh bein, quant à mé -, et ou s'est arrêtée là.
Eh bein, j'y'ai dit, quant à té - tchi?
Pâslons d'autre chose, oulle a dit. La Louisa est prèsque seuze que l'Frainque Le Boutillyi prendra pour Juge à la preumié vacance. As-tu - ?
Nanin, j'y'ai dit. Pâslons d'autre chose.
Ph'lip
1956
Viyiz étout: